2 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Արմավիրի մարզում և Տավուշի Կոթի համայնքում կարկտահարության պատճառած վնասների չափը պարզ կդառնա հաջորդ շաբաթվա սկզբին: «Արմենպրես»-ի փոխանցմամբ՝ այս մասին լրագրողների հետ ճեպազրույցում ասաց ՀՀ գյուղատնտեսության նախարար Արթուր Խաչատրյանը: Նրա խոսքով՝ իրենց ձեռքի տակ են համայնքներն ու հողատարածքները, որոնք տուժել են, ներկայում խմբերը տեղում աշխատում են վնասի չափը պարզելու համար:
Անդրադառնալով գյուղապետերի դիտարկմանը, թե վնասները 100 տոկոս են կազմել՝ նախարարը նշեց՝ ուսումնասիրությունների արդյունքում դա պարզ կդառնա: «Արմավիրում վնասվել են ծիրանի և խաղողի այգիները: Կոթիում դաշտավարությունն է տուժել: Այսօր խումբ ենք ուղարկել Արմավիրի մարզ, արդյունքները պարզ կլինեն երկուշաբթի, Կոթիում՝ նեղ դաշտավարություն է, երեքշաբթի-չորեքշաբթի կունենանք վերջին կարկուտի պատճառած վնասների պատկերը»,-ասաց Արթուր Խաչատրյանը:
Ինչ վերաբերում է վարչապետի հանձնարարականին՝ փոխհատուցման մեխանիզմների վերանայման ուղղությամբ, գյուղնախարարը նկատեց, որ նախ պետք է հասկանան վնասների չափը, պետության հնարավորությունները, ապա մշակեն փոխհատուցման արդյունավետ ձևերը:
Համաձայն մամուլի հրապարակումների՝ հունիսի 16-ին տեղացած ուժեղ կարկուտից Կոթի գյուղի շուրջ 400 հեկտար հացահատիկի արտերի բերքը ոչնչացել է: Կոթիի հարևան՝ Բարեկամավան գյուղում կարկուտը վնասել է տնամերձ ցանքերը, պտղատու ծառերը: