2 րոպեի ընթերցում
ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Մայրաքաղաքում հունիսի 1-ին մեկնարկելու է «Երևանյան ամառ-2018» եռամսյա միջոցառումների ծրագիրը:
«Արմենպրես»-ի հաղորդմամբ, այս մասին լրագրողների հետ հանդիպմանն ասաց Երևանի քաղաքապետարանի աշխատակազմի արտաքին ձևավորման և գովազդի վարչության պետ Արազ Բաղդասարյանը: Նրա խոսքով՝ միջոցառումն արդեն 6-րդ տարին է անցկացվում՝ Երևանի քաղաքապետ Տարոն Մարգարյանի նախաձեռնությամբ: «Միջոցառման նպատակը Երևանում ամառն ավելի ուրախ և բազմաբովանդակ դարձնելն է: Յուրաքանչյուր մարդ կարող է գտնել իր ճաշակին համապատասխան միջոցառում»,-ասաց նա՝ հավելելով, որ «Երևանյան ամառ-2018»-ն այս տարի նվիրվում է Երևանի հիմնադրման 2800-ամյակին:
Ծրագրի շրջանակում 50-ից ավելի միջոցառումներ են ընդգրկված, բայց Երևանի հիմնադրման 2800-ամյակի կապակցությամբ՝ այլ բազմաբովանդակ միջոցառումներ ևս կլինեն:
«Երևանյան ամառ-2018» թվականի ծրագրի լոգոտիպը խորհրդանշական է: Կենտրոնում մարդն է, և բոլոր միջոցառումներն ուղղված են լինելու մարդկանց ժամանակը էլ ավելի ուրախ դարձնելուն: Այդ ամենից հետո էլ սպասում ենք դրական էմոցիաների պոռթկում»,-նշեց Բաղդասարյանը:
Երևանի քաղաքապետարանի աշխատակազմի արտաքին ձևավորման և գովազդի վարչության պետը տեղեկացրեց, որ միջոցառումների մասին տեղեկատվություն կարելի կլինի ստանալ հատուկ բուկլետների միջոցով, որոնք լինելու են բոլոր վարչական շրջանների և Երևանի քաղաքապետարանի մեկ պատուհանում, քաղաքապետարանի կայքերից, ֆեյսբուքյան էջից, մայրաքաղաքի զբոսաշրջիկների համար նախատեսված տուրիստական կետերից:
«Լինելու են ոչ միայն յուրաքանչյուր տարի իրականացվող միջոցառումներ, այլև բազմապիսի նոր միջոցառումներ՝ մայրաքաղաքի հիմնադրման 2800-ամյակի հետ կապված»,-հավելեց Արազ Բաղդասարյանը: