ԱԺ նոր պատգամավորները երդմամբ ստանձնեցին պարտականությունները

2 րոպեի ընթերցում

ԵՐԵՎԱՆ, 22 ՄԱՅԻՍԻ, ԱՐՄԵՆՊՐԵՍ: Ազգային ժողովի նոր պատգամավորները երդմամբ ստանձնեցին պատգամավորի պարտականությունները: Ինչպես հաղորդում է «Արմենպրես»-ը, Ազգային ժողովի հերթական քառօրյա նիստի մեկնարկին ԱԺ փոխնախագահ Էդուարդ Շարմազանովը նոր պատգամավորներին հերթով ամբիոնի մոտ հրավիրեց՝ երդվելու համար:

Պատգամավորներն ընթերցեցին հետևյալ տեքստը. «Հանուն համազգային նպատակների իրականացման և հայրենիքի հզորացման և բարգավաճման երդվում եմ՝ բարեխղճորեն կատարել ժողովրդի առջև ունեցած պարտավորություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության և շահերի պահպանմանը, անել ամեն ինչ քաղաքացիական համերաշխության, ազգային և համամարդկային արժեքների պահպանման համար»:

Պատգամավորի պարտականությունները երդմամբ ստանձնեցին «Ելք» խմբակցության նորընտիր պատգամավորներ Ալեն Սիմոնյանը, Հրաչյա Հակոբյանը, Հովիկ Աղազարյանը, Հայկ Կոնջորյանը, ՀՅԴ խմբակցության պատգամավոր Ռուզաննա Առաքելյանը, ՀՀԿ խմբակցության պատգամավոր Հակոբ Հակոբյանը:

Նորընտիր պատգամավորները խորհրդարանում փոխարինել են այն պատգամավորներին, ովքեր տեղափոխվել են նոր կառավարություն (ձևավորվել է մայիսի 12-ին) կամ ապրիլից Հայաստանում մեկնարկած շարժման ընթացքում մանդատից հրաժարվելու դիմումներ են ներկայացրել:

Բաժանորդագրվեք մեր ալիքին Telegram-ում