2 րոպեի ընթերցում
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: Հարավային Կորեան եւ ԿԺԴՀ-ն դադարեցնում են փոխադարձ բոլոր թշնամական գործողությունները: Այդ մասին, ինչպես հաղորդել Է ՏԱՍՍ-ը, ասված Է հռչակագրում, որն ստորագրել են երկու երկրների ղեկավարները՝ Մուն Չժե Ինը եւ Կիմ Չեն Ընը, տեղեկացնում Է «Արմենպրես»-ը:
Հռչակագրում նշվում Է, թե Հարավային Կորեան եւ ԿԺԴՀ-ն հաստատել են, որ իրենց ընդհանուր նպատակը Կորեական թերակղզու միջուկազերծումն Է: Կողմերը կշարունակեն ակտիվ երկխոսությունը բարձր մակարդակով:
Հարավային Կորեայի եւ ԿԺԴՀ-ի զինվորականները նաեւ պայմանավորվել են մշտական կապ պահպանել, այդ թվում՝ պաշտպանական գերատեսչությունների ղեկավարների մակարդակով: Բացի այդ, Քեսոնում ստեղծվելու Է օպերատիվ կապի համատեղ կետ: Հռչակագրի համաձայն, երկրները պայմանավորվել են լուծել նաեւ հումանիտար խնդիրները, ներառյալ կորեական ընտանիքների վերամիավորման հիմնախնդիրը:
Ի թիվս այլ միջոցառումների, Հարավային Կորեան եւ ԿԺԴՀ-ն պայմանավորվել են աշխատանք սկսել երկու երկրների երկաթուղիների միավորման համար: Ճշտվում Է, որ Հարավային Կորեան, ԿԺԴՀ-ն եւ ԱՄՆ-ը հեռանկարում կօժանդակեն եռակողմ կամ քառակողմ գագաթնաժողովի անցկացմանը՝ նպատակ ունենալով կայուն խաղաղության հաստատումը: Նշվում Է, որ Հարավային Կորեայի եւ ԿԺԴՀ-ի ղեկավարները գրկախառնվել են համատեղ հռչակագրի ստորագրումից հետո: