Թուրքիայի Ինջիրլիքի ռազմաբազան չի օգտագործվել Սիրիայի դեմ հարձակումների ժամանակ
1 րոպեի ընթերցում
![Թուրքիայի Ինջիրլիքի ռազմաբազան չի օգտագործվել Սիրիայի դեմ հարձակումների ժամանակ](http://armenpress.am/resized/480/static/news/b/2018/04/929947.jpg)
ԵՐԵՎԱՆ, 14 ԱՊՐԻԼԻ, ԱՐՄԵՆՊՐԵՍ: Թուրքիայի փոխվարչապետ Բեքիր Բոզդաղը հայտարարել է, որ Միացյալ Նահանգների, Մեծ Բրիտանիայի և Ֆրանսիայի կողմից Սիրիայի տարածքը հրթիռակոծելու ժամանակ թուրքական Ինջիրլիքի ռազմաբազան չի օգտագործվել: Ինչպես հաղորդում է «Արմենպրես»-ը, այս մասին Բոզդաղը գրառում է կատարել թվիթերյան միկրոբլոգում:
«Սիրիայում օբյեկտների վրա ԱՄՆ, Մեծ Բրիտանիայի և Ֆրանսիայի հարձակումից առաջ նախագահներ Էրդողանի և Թրամփի հանձնարարականներով զրուցել են ԱՄՆ և Թուրքիայի զինված ուժերի գլխավոր շտաբերի պետերը: Թուրքիան հարձակումից առաջ տեղեկացվել է այդ մասին: Հարձակման ժամանակ Ինջիրլիքի ռազմաբազան չի օգտագործվել»,- գրել է փոխվարչապետը:
Բոզդաղը հայտնել է նաև, որ Թուրքիայի նախագահ Ռեջեփ Թայիփ Էրդողանը Սիրիայում զարգացումների վերաբերյալ հեռախոսազրույց է ունեցել ԱՄՆ և Ռուսաստանի նախագահներ Դոնալդ Թրամփի և Վլադիմիր Պուտինի հետ: