Վարչապետի որոշմամբ ստեղծված աշխատանքային խումբը պատրաստ է Հայաստանում տուրիզմի զարգացման առաջարկություններ քննարկել
1 րոպեի ընթերցում
![Վարչապետի որոշմամբ ստեղծված աշխատանքային խումբը պատրաստ է Հայաստանում տուրիզմի զարգացման առաջարկություններ քննարկել](http://armenpress.am/resized/480/static/news/b/2018/03/926779.jpg)
ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: Վարչապետի մարտի 15-ի որոշմամբ ստեղծվել է աշխատանքային խումբ, որը կզբաղվի Հայաստանում զբոսաշրջության խթանմանը վերաբերող հարցերի քննարկմամբ:ՀՀ վարչապետի մամուլի խոսնակ Արամ Արարատյանը, մեկնաբանելով այդ որոշումը, «Արմենպրես»-ին ասել է, որ ստեղծված աշխատանքային խմբի նպատակն է լինելու քննարկել այս ուղղությանը վերաբերող հարցերի լայն շրջանակ՝ ոլորտի տնտեսավարող սուբյեկտների և շահագրգիռ կազմակերպությունների հետ:
Արամ Արարատյանը նշել է, որ խմբում ներգրավված են մի շարք պետական գերատեսչությունների ներկայացուցիչներ, այնղեկավարելու է Ռազմավարական նախաձեռնությունների կենտրոնի տնօրեն Ալեքսանդր Խաչատուրյանը:
Հիշեցնելով, որ 2017թ. Հայաստանում զբոսաշրջության ոլորտում գրանցվել է շուրջ 18 տոկոս աճ և այս տարի վարչապետը նպատակ է դրել պահպանել այդ դրական միտումն ու էլ ավելի բարձր ցուցանիշներ գրանցել, խոսնակը հրավիրել է շահագրգռված բոլոր անձանց ակտիվ ներգրավվել այդ քննարկումներին, իրենց մոտեցումները և պատկերացումները ներկայացնել Հայաստանում զբոսաշրջության զարգացման խթանման վերաբերյալ՝ լավագույն լուծումներ տալու նպատակով: