1 րոպեի ընթերցում
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: Պետական աջակցությամբ կազմակերպվող փառատոնները հիմնականում անցկացվում են Հայաստանի մարզերում: Այն քաղաքականություն է, որն ուղղված է զբոսաշրջության ապակենտրոնացմանը հանրապետության մարզերում: «Արմենպրես»-ի հաղորդմամբ՝ սեպտեմբերի 8-ին լրագրողների հետ հանդիպմանն այս մասին ասաց Զբոսաշրջության պետական կոմիտեի փոխնախագահ Մեխակ Ապրեսյանը:
«Մարզերում փառատոնների անցկացումը մշակված քաղաքականություն է, որն ուղղված է զբոսաշրջությունը հանրապետության մարզերում ապակենտրոնացմանը, համայնքներում զբոսաշրջության զարգացմանը: Այն նաև նպաստում է ընդունող և շրջակա համայնքներում տեղական ավանդույթների պահպանմանն ու զարգացմանը»,-ասաց Ապրեսյանը:
Նրա խոսքով՝ համայնքներում իրականացվող փառատոններն օգնում են թե տեղական, թե համաշխարհային շուկային դրանց պատշաճ ներկայացմանն ու խթանմանը: Փառատոններն էապես նպաստում են շատ խնդիրների լուծմանը:
«Կա քաղաքականություն՝ պետական աջակցություն ցուցաբերել տեղական նման նախաձեռնություններին»,-նշեց Ապրեսյանն ու հավելեց՝ Հայաստանյան փառատոնները զբոսաշրջային արդյունք են: Դրանք նաև հարթակ են զբոսաշրջության այլ ձևերի կազմակերպման ու ներկայացման համար: