2 րոպեի ընթերցում
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Հայրենիքի պաշտպանի օրվա տոնակատարության շրջանակներում Հայաստանի ռուսական ռազմակայանում՝ Գյումրիի «Մեծ ամրոց» զինվորական ավանի տարածքում, անցկացվում Է «Հայրիկը, մայրիկը, ես՝ համերաշխ ընտանիք» սպարտակիադան Գյումրիի եւ Երեւանի զինվորական կայազորների զինծառայողների, քաղաքացիական անձնակազմի եւ նրանց ընտանիքների անդամների մասնակցությամբ:
Ինչպես «Արմենպրես»-ին տեղեկացրել են ՌԴ Հարավային ռազմական օկրուգի մամուլի ծառայությունում, ավելի քան 1000 մասնակիցների շրջանում մրցումներն անցկացվում են մինի ֆուտբոլի, վոլեյբոլի, դահուկներով փոխանցավազքի, պարանի ձգման, ծանրաքարերի եւ ուժային եռամարտի գծով:
Խաղերի եւ փոխանցավազքերի մի մասն անցկացվում են ռազմակայանի հրապարակում, մարզադաշտերում եւ մարզահրապարակներում, մյուս մասը՝ Գյումրիի զինվորական կայազորի մարզահամալիրներում եւ մարզասրահներում:
Մրցումների բոլոր մասնակիցներին, ովքեր կգրավեն մրցանակային տեղեր, միավորման հրամանատարը հանդիսավոր պայմաններում կհանձնի հուշանվերներ եւ պատվոգրեր:
Մարզական մրցումները կավարտվեն կտրտված տեղանքով զանգվածային դահուկավազքով:
Մարզական միջոցառումներից հետո մրցումների մասնակիցների եւ հրավիրված հյուրերի համար զորամիավորման անձնակազմի հետ աշխատանքի բաժինը կազմակերպել Է մշակութային-ժամանցային ծրագիր՝ զանգվածային զբոսահանդեսներով, համերգով եւ զինվորական շիլայի հյուրասիրմամբ:
