ՀՀ նախագահ Ռոբերտ Քոչարյանն ուղերձ է հղել Հայոց ցեղասպանության 92- րդ տարելիցի կապակցությամբ
2 րոպեի ընթերցում
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանը ուղերձ է հղել Հայոց ցեղասպանության 92-րդ տարելիցի կապակցությամբ: Ինչպես «Արմենպրեսե- ին տեղեկացրին ՀՀ նախագահի մամլո գրասենյակից, ուղերձում մասնավորապես ասվում է. «Սիրելի( հայրենակիցներ, Յուրաքանչյուր տարի ապրիլի 24-ին մենք ոգեկոչում ենք Օսմանյան Թուրքիայում հայերի ցեղասպանության անմեղ զոհերի հիշատակը: Բայց հիշողությունն այդ ոճրագործության մասին մեր հոգիներում միշտ է առկա: Հայ ժողովրդի հետ այս օրը հիշում եւ ոգեկոչում են աշխարհի բազմաթիվ երկրներ: Միջազգային հանրությունը գիտակցել է, որ ցեղասպանությունը հանցագործություն է` ուղղված ոչ միայն առանձին ժողովրդի, այլեւ ողջ մարդկության դեմ. հանցագործություն, որի նախապատրաստումից եւ իրագործումից պակաս վտանգավոր չեն դրա ժխտումն ու քողարկումը: Փորձություններն ու անարդարության զգացումն ունեն միավորելու հատկություն: Ցեղասպանության արհավիրքը խտացրեց հայ ինքնության զգացումը, ստիպեց հայությանը համախմբվել, ուժեղացրեց անկախ պետականության իղձը: Լինելով հայության դարավոր երազանքի արտացոլումը` Հայաստանի Հանրապետությունը պետք է շենանա եւ զարգանա որպես համայն հայության Հայրենիք: Ուժեղ, ժողովրդավարական, բարեկեցիկ Հայաստանը պետք է լինի հայ ժողովրդի պատասխանը Հայոց եղեռնը ծրագրողներին, իրագործողներին եւ ժխտողներինե: