2 րոպեի ընթերցում
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Հանրապետության քրդաբնակ համայնքների դպրոցներն ապահովվել են քրդերի կոմպակտ բնակության համայնքներում գործող դպրոցների 1-12-րդ դասարանների համար նախատեսված դասագրքերով:
Ինչպես «Արմենպրես»-ի հետ զրույցում ասաց ՀԳՄ քուրդ գրողների բաժանմունքի նախագահ, բանաստեղծ Ալիխանե Մամեն, նման գիտականորեն մշակված դասագրքեր ունենալը պատմական իրադարձություն է: «Քուրդ ժողովրդի պատմության մեջ նման մշակված դասագրքեր դեռ չէին տպագրվել: Թվով 13 դասագիրք է հրատարակվել: Հայաստանում հնարավորություն տրվեց պետականորեն իր տեսակով եզակի ծրագրերով ու նախագծերով, գիտական մշակվածությամբ դասագրքեր հրատարակել: Քուրդ ժողովրդի կյանքում այս իրադարձությունը հիրավի պատմական է»,- նշեց դասագրքերի հեղինակը: Նա մտահոգություն հայտնեց, որ քրդերեն դասավանդող մասնագետների պակաս կա, սակայն հեղինակի կողմից իրականացվում են վերապատրաստման դասընթացներ:
Բանաստեղծը հիշեցրեց, որ մինչ իր դասագրքերի հրատարակությունը, փոքրամասնությունների համար նախատեսված դպրոցներում դասավանդվում էին եզդիական դասագրքերով:
Քրդերեն դասագրքերում առաջին անգամ փորձ է արվել ըստ ժամանակագրության ամբողջացնել քրդական գրականությունը` սկզբնավորման շրջանից մինչև մեր օրերը: Դասագրքերը լույս են տեսել «Սպիկա» հրատարակչությունում` պետության հովանավորությամբ: