Անհայտ անձինք հարձակում են գործել Կիևում Ռուսաստանի դեսպանատան վրա

ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Շուրջ 20 ծայրահեղականներ հարձակվել են Կիևում Ռուսաստանի դեսպանատան վրա: Նրանք դեսպանատան տարածք են նետել ծխարձակ պայթուցիկներ: Այս մասին հաղորդում է «Արմենպրես»-ը` վկայակոչելով «ՏԱՍՍ» գործակալությանը:

Գործակալության աղբյուրը հայտնել է, որ գիշերը ժամը 1-ին անհայտ անձինք դեսպանատան տարածք են նետել պայթուցիկներ, ինչպես նաև այդ ուղղությամբ կրակ են բացել`կիրառելով հրավառության սարքեր: Կրակոցները ուղղված են եղել դիվանագիտական առաքելություն իրականացնող շենքին:

Դեսպանատունը ճշտել է, որ տեղի ոստիկանությունը չի ձերբակալել հարձակում գործած անձանց: Այդուհանդերձ, տեղի լրատվամիջոցները հաղորդում են, որ ոստիկանությունը փաստի վերաբերյալ ճշտումներ է կատարում, դեպքի հետ կապված նյութերն արձանագրված են: