Ազատ Արշակյանը տարածքային փոխզիջումների մասին խոսակցություններ շրջանառողներին սադրիչներ է համարում
2 րոպեի ընթերցում
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Արցախում դասեր են քաղել քառօրյա պատերազմից, և երկրի ղեկավարության կողմից ամեն ինչ արվում է թերությունները շտկելու և նույն սխալներ չկրկնելու համար. այնտեղ կյանքն ընթանում է բնականոն հունով, և երկիրը շարունակում է զարգանալ: Օգոստոսի 29-ին լրագրողների հետ հանդիպմանն այս մասին ասաց Գերագույն խորհրդի նախկին պատգամավոր Ազատ Արշակյանը, ով վերջերս է վերադարձել Արցախից: «Հիմա Արցախում խաղաղության են պատրաստվում: Մարդիկ զբաղված են իրենց առօրյա աշխատանքներով: Այնտեղ հետևություններ են արել քառօրյա պատերազմից և քայլեր են ձեռնարկում, որպեսզի այդ ամենը չկրկնվի»,- «Արմենպրես»-ի հաղորդմամբ՝ նշեց Արշակյանը:
Արշակյանը հավելեց, որ հանդիպումներ է ունեցել Արցախի ղեկավարության հետ, և այդ հանդիպումների ընթացքում բոլորը վստահեցրել են, որ Լեռնային Ղարաբաղի հարցն արդեն լուծված է: «Նրանք վստահեցնում են, որ Արցախը պատկանում է իր իսկական տիրոջը, և խնդիրը լուծված է»,- ընդգծեց նա:
Անդրադառնալով փոխզիջումների մասին խոսակցություններին՝ Ազատ Արշակյանն ընդգծեց, որ նման խոսակցություններ շրջանառողները սադրիչներ են:
Ազգային ժողովի ՀՀԿ խմբակցության պատգամավոր Սուքիաս Ավետիսյանը համաձայնեց Ազատ Արշակյանի հետ, որ Արցախում դասեր են քաղել քառօրյա պատերազմից և քայլեր են ձեռնարկվում թերությունները շտկելու ուղղությամբ: Պատգամավորն էլ այն կարծիքին է, որ տարածքային փոխզիջումների մասին խոսակցությունները դրսից են ներմուծվում՝ խառնաշփոթ ստեղծելու համար: