Կայացավ Երևանի գարեջրի 3-րդ փառատոնը

ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Երևանի քաղաքապետարանի «Երևանյան ամառ 2016» եռամսյա միջոցառումների ծրագրի շրջանակում կազմակերպված Երևանի գարեջրի 3-րդ փառատոնը գարեջրասերներին մեկտեղել էր մայրաքաղաքի Կարապի լճի հարակից տարածքում: Այս մասին «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, որի հաղորդագրության մեջ նաև նշված է. «Հայկական գարեջրագործության լավագույն ավանդույթները, գարեջրի ստեղծման շուրջ երեքհազարամյա պատմությունը ներկայացրել էին հայկական գարեջրային շուկայի առաջատար ընկերությունները,մայրաքաղաքային գարեջրատները, սրճարաններն ու փաբերը: Երևանի քաղաքապետ Տարոն Մարգարյանի անունից ողջունելով գարեջրասերներին և մասնակից ընկերությունների ներկայացուցիչներին, Երևանի քաղաքապետի օգնական Մարիա Բարաղամյանը նշել է, որ «Համով-հոտով Երևան» և «Երևան ՏԱՐԱԶֆեստ» խոշոր փառատոններից հետո այս փառատոնը նույնպես արդեն հասցրել է սիրվել ինչպես մայրաքաղաքի բնակիչների, այնպես էլ քաղաքի հյուրերի կողմից:

«Երևանի գարեջրի փառատոնը, որն անցկացվում է արդեն երրորդ անգամ, Երևան քաղաքի զբոսաշրջային ծրագրի կարևոր բաղադրիչներից է և իր ուրույն նպաստն է բերում միջոցառումային զբոսաշրջության զարգացմանը մայրաքաղաքում:

Փառատոնի այցելուների քանակը նախորդ տարիներին գերազանցել է 4000-ը: Երևանի գարեջրի փառատոնի նպատակը հանրությանը հայկական գարեջրի առանձնահատկություններին ծանոթացնելն ու հայկական շուկայում գարեջրի արտադրությամբ զբաղվող ընկերություններին մեկ հարթակի ներքո համախմբելն է», - նշել է Մարիա Բարաղամյանը:

Փառատոնի շրջանակում գործել են 20 տաղավարներ, որոնք ներկայացրել են շուրջ 15 ընկերություններ: Առանձին տաղավարներում փառատոնի մասնակիցներին առաջարկվել է գարեջրի թարմ տեսականի ու համապատասխան խորտիկներ:

Փառատոնն ընթացել է տարատեսակ մրցույթներով. հնարավորին արագ ըմպել, ըմպել ձողիկով, որոշել նրբերշիկի համը, արագ մաքրել գետնանուշ, արագ ուտել խեցգետին և այլ մրցույթներ, որոնց մասնակցել են բոլոր ցանկացողներն ու ստացել անակնկալ նվերներ, ինչպես Երևանի քաղաքապետարանի, այնպես էլ մասնակից ընկերությունների կողմից: Ի դեպ, թե նրանք, և թե գարեջրասերները ողջունել են արդեն ավանդական դարձած այս միջոցառումը` հատկանշելով, որ այն գարեջրի արտադրության բնագավառի նորամուծություններին, նոր տեսականուն ծանոթանալու ու, ընդհանրապես, գարեջրային միջավայրում հրաշալի ժամանակ անցկացնելու հրաշալի հնարավորություն է: Ի դեպ, փառատոնի կանոնակարգի համաձայն՝ գարեջուրը եղել է վճարովի, այն չի վաճառվել ապակյա տարաներով, իսկ գնելու հնարավորություն են ունեցել միայն չափահասները: Փառատոնին այս տարի առաջին անգամ մասնակցել է ԼՂՀ էկոնոմիկայի նախարարության զբոսաշրջության վարչությունը՝ «Ղարաբաղ. թաքնված գանձ» տաղավարով` ներկայացնելով արցախյան զբոսաշրջային ներուժը: Փառատոնի ավարտին մասնակից ընկերությունները Երևանի քաղաքապետ Տարոն Մարգարյանի անունից ստացել են մասնակցության-շնորհակալագրեր:

Երեկոն ուղեկցվել է համերգային հագեցած ծրագրով: Կենդանի հնչողությամբ հանդես են եկել «Alexandrapol» և «Boeing» բենդերը: Ներկաների բարձր տրամադրությունն է ապահովել նաև DJ Soprano-ն:

Տեղում աշխատել են շտապօգնության և ՀՀ ոստիկանության հասարակական կարգի պահպանության ծառայությունները: