Կիևում ավտոմեքենայի պայթյունից մահացել է հայտնի լրագրող Պավել Շերեմետը

ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Ուկրաինայում հայտնի լրագրող Պավել Շերեմետը Կիևում մահացել է սեփական մեքենայի պայթյունի հետևանքով: Ինչպես հաղորդում է «Արմենպրես»-ը, այս մասին տեղեկացնում է Russia Today-ը:

Մեքենան պայթել է շարժիչը գործի դնելուց մի քանի րոպե անց: Ուկրաինայի դատախազությունը կատարվածը որակել է որպես սպանություն, որն իրականացվել է նրա մեքենայում տեղադրված ռումբի միջոցով:

Շերեմետը Ուկրաինայի և Ռուսաստանի հարցերով մասնագիտացած հայտնի լրագրող էր, ով վերջին հինգ տարիների ընթացքում բնակվել և աշխատում էր Ուկրաինայում: Նա աշխատում էր «Ուկրաինսկայա պրավդա» լրատվականի համար: Սպանության օրը Շերեմետը շտապում էր Радио Вести-ի եթերին: