Աշխարհի գերտերությունների նախագահները սկսել են հաճախ քննարկել Ղարաբաղի կարգավորման հարցը. Հայկ Բաբուխանյան
1 րոպեի ընթերցում
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Շատ լուրջ համաշխարհային գործընթաց է տեղի ունենում, որտեղ Ղարաբաղի հարցը դարձել է գերտերությունների վարած քաղաքականության կարևոր օղակներից մեկը:
Ինչպես տեղեկացնում է «Արմենպրես»-ը` այս մասին հուլիսի 6-ին ասուլիսի ընթացքում նշեց ՀՀԿ խմբակցության պատգամավոր Հայկ Բաբուխանյանը:
«Շատ լուրջ համաշխարհային գործընթաց է տեղի ունենում, որը վերաբերում է և՛ Ղարաբաղի, և՛ Սիրիայի, և՛ Հարավ-Արևելյան Ասիայի կղզիների հարցերին: Աշխարհի գերտերությունների նախագահները սկսել են հաճախ քննարկել Ղարաբաղի կարգավորման հարցը և համապարփակ լուծումներ տալ այդ հարցին»,- նշեց Բաբուխանյանը: Պատգամավորի խոսքով` հարցին համապարփակ լուծում տալն անհրաժեշտություն է, որտեղ սկզբունքային պետք է լինի ազգային ինքնորոշման իրավունքը և հիմնախնդրի խաղաղ լուծումը:
«Մենք շահագրգռված ենք խաղաղ կարգավորման, սակայն պետք է նաև շահագրգռված լինենք բանակցություններով խնդրին վերջնական լուծում տալու: Մեզ ճիշտ դրսևորելով և այս պահը նպաստավոր օգտագործելով, կկարողանանք մեր ազգային խնդիրները լուծել: Այսինքն՝ կկարողանանք ապահովել ժողովրդի անվտանգությունը և Լեռնային Ղարաբաղի ինքնորոշման իրավունքը դարձնել առաջնային»,- ասաց Հայկ Բաբուխանյանը: