«Հայաստան» հիմնադրամի «Մարաթոն-2016»-ի հասույթը կուղղվի քառօրյա պատերազմի ավերածությունների վերացմանը

ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: «Հայաստան» համահայկական հիմնադրամի «Մարաթոն-2016»-ի հասույթը կուղղվի Արցախում քառօրյա պատերազմի ավերածությունները վերացնելուն, այլ առաջարկներ չլինելու պարագայում: «Արմենպրես»-ի փոխանցմամբ` այս մասին լրագրողներին հայտնեց հիմնադրամի գործադիր տնօրեն Արա Վարդանյանը: «Եթե այլ առաջարկներ չլինեն, երևի թե դա կընդունվի որպես այս տարվա գլխավոր ռազմավարական թեմա»,-ասաց Վարդանյանը: Հարցին ի պատասխան, թե որքան գումար կպահանջվի ծրագրի իրագործման համար` Արա Վարդանյանը նշեց, որ ԼՂՀ կառավարությունն սկսել է հաշվարկները, բայց դեռ չի կարող ասել, թե որքան գումար է անհրաժեշտ: «Օժանդակությունը պետք է լինի բազմաշերտ` սկսած դեղորայքի առաքումից մինչև տների վերանորոգում, ընտանիքներին օջակցության տրամադրում: Այն ընտանիքներում, որտեղ եղել են զոհվածներ, նրանց ավելի մեծ օգնություն կտրամադրվի: Աջակցության ձևերը դեռ կոնկրետացման փուլում են»,-հավելեց հիմնադրամի տնօրենը:

Անդրադառնալով հարցին, որ վերջին մեկ ամսվա ընթացքում տարբեր կողմերից դրամական աջակցություն է տրամադրվել պատերազմի հետևանքների վերացմանը, արդյոք դեռ բացեր կան` Արա Վարդանյանը նշեց. «Բացը միշտ էլ լինելու է, քանի որ քառօրյա պատերազմի ավերածություններից բացի, Արցախում կան բազմաթիվ խնդիրներ` լինի ջրատարների կառուցում, դպրոցների շինարարություն և այլն: Պարզապես այս տարի ավելի շատ կենտրոնանալու ենք այն շրջանների վրա, որոնք ավելի շատ են վնասվել այդ օրերի ընթացքում»:

ՀՀ նախագահ Սերժ Սարգսյանի գլխավորությամբ` մեկնարկեց «Հայաստան» համահայկական հիմնադրամի հոգաբարձուների խորհրդի և տեղական մարմինների 25-րդ համատեղ նիստը: Հոգաբարձուների խորհրդի 33 անդամներից ներկա է 29-ը, ներկա են տեղական մարմինների 24 ներկայացուցիչներ, քվորումն ապահովված է, սկսվեց նիստի աշխատանքը: Հոգաբարձուների խորհրդի նիստին մասնակցելու համար Երևան է ժամանել Լեռնային Ղարաբաղի Հանրապետության նախագահ Բակո Սահակյանը, ով զեկույց կներկայացնի «Հայաստան» համահայկական հիմնադրամի Մարաթոն 2016-ի նպատակաուղղվածության մասին: