388.16
Լոռու մարզպետն Ալավերդու համայնքապետի ուղեկցությամբ այցելել է Սանահին կայարան թաղամաս
1 րոպեի ընթերցում
ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ։ Լոռու մարզպետ Արամ Ղազարյանն Ալավերդու համայնքապետ Դավիթ Ղումաշյանի ուղեկցությամբ հունիսի 26-ին այցելել է Սանահին կայարան թաղամաս, հետևել ջրամատակարարման և ջրահեռացման համակարգի այստեղ ընթացող հիմնանորոգման աշխատանքներին, զրուցել բնակիչների հետ: «Արմենպրես»-ի հաղորդմամբ՝ այս մասին հայտնում են ՀՀ Լոռու մարզպետի աշխատակազմից։
Ըստ աղբյուրի՝ այց է կատարվել նաև Թումանյան փողոց։
Մարզի ղեկավարը շրջայցը շարունակել է Ախթալայի կամրջի մոտ, հետևել երկաթգծի հատվածում տարվող ամրացման աշխատանքներին, ճանապարհային երթևեկության անվտանգության ապահովման հետ կապված հարցերով զրուցել կամրջի մոտ ծառայություն իրականացնող ոստիկանների հետ:
Արամ Ղազարյանն այցելել է նաև Քարկոփ բնակավայր: Մաքրման աշխատանքները Քարկոփում ավարտական փուլում են:
Լոռու մարզպետը զրուցել է բնակիչներ հետ, պատասխանել նրանց հարցերին: Մարզպետը տեղեկացրել է, որ քննարկվում է հեղեղումներից տուժած բնակիչներին և տնտեսվարողներին փոխհատուցում տրամադրելու կարգը:
