388.06
«Դեղերի մասին» նոր օրենքը հանգեցնելու է դեղերի որակի բարձրացմանը և գների նվազեցմանը. Արմեն Մուրադյան
2 րոպեի ընթերցում
ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: «Դեղերի մասին» նոր օրենքի ընդունումից հետո Հայաստանում դեղերը պետք է էժանանան: Ազգային ժողովում կառավարության հետ հարցուպատասխանի ժամանակ այս մասին ասաց ՀՀ առողջապահության նախարար Արմեն Մուրադյանը՝ պատասխանելով անկախ պատգամավոր Էդմոն Մարուքյանի հարցին:
«Առաջին անգամ Հայաստանում օրենքով ամրագրվել է, որ պետությունը խառնվելու է դեղերի շուկային: Այսինքն, պետությունը սկսելու է կանոնավորման գործընթաց առողջապահության նախարարության կողմից փոխհատուցվող դեղերի վերաբերյալ: Այս ամբողջ գործընթացը ոչ միայն որակապես փոխելու է իրավիճակը և բերելու է խստացման: Խստացվում են վարչական տույժերը չգրանցված, կեղծված դեղեր հայտնաբերելու դեպքում, ինչը բերելու է դեղերի որակի բարձրացմանը և գների նվազմանը»,- «Արմենպրես»-ի հաղորդմամբ՝ նշեց Մուրադյանը:
Նախարարը հավելեց, որ նոր օրենքը հնարավորություն է տալու պայքարել դեղերի շուկայում մենաշնորհների դեմ՝ հաշվի առնելով, որ տարանջատվում են մեծածախ և մանրածախ ցանցերը:
Հարցին՝ ինչո՞ւ հարևան Վրաստանում դեղերի գներն ավելի էժան են, քան Հայաստանում, նախարարը պատասխանեց. «Դրա պատճառը շատ պարզ է: Վրաստանում դեղերի վրա ավելացված արժեքի հարկ չի գործում: Բացի այդ, Վրաստանում դեղերի ներմուծման տրանսպորտային ուղիներն ավելի հարմարավետ են: Հայաստանում դեղերի ներմուծումն իրականացվում է ինքնաթիռով, իսկ Վրաստանում դա լինում է ծովային ճանապարհով, ավտոմեքենաներով»:
