368.59
Պենտագոնը ամերիկյան զինվորականների ընտանիքներին դուրս է բերում Թուրքիայից
2 րոպեի ընթերցում
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ: ԱՄՆ-ի պաշտպանության նախարարությունը` Պենտագոնը անվտանգության նկատառումներով պարտավորեցրել է ամերիկյան զինծառայողներին լքել Թուրքիայի հարավային քրդաբնակ տարածաշրջանները:
Ինչպես հաղորդում է «Արմենպրես»-ը, այս մասին հայտնել է ԱՄՆ-ի զինված ուժերի Եվրոպական հրամանատարությունը:
«Պաշտպանության նախարար Էշթոն Քարթերը ԱՄՆ-ի պետքարտուղար Ջոն Քերիի հետ խորհրդակցությունից հետո թուրքական Ադանա (նաեւ Ինջիռլիք ավիաբազա), Իզմիր եւ Մուղլա քաղաքներում ծառայող ամերիկյան զինվորականների ընտանիքներին պարտավորեցրել է վերադառնալ հայրենիք», -ասվում է փաստաթղթում:
Հրամանատարությունը պարզաբանել է, որ որոշումն ընդունվել է «տարածաշրջանում անվտանգության ոլորտում շարունակվող խնդիրների պատճառով, որը կոչված է կրճատել Պենտագոնի զինծառայողների, այդ թվում` նրանց ընտանիքների համար ռիսկերը` միաժամանակ ապահովելով ԱՄՆ-ի ԶՈւ անվտանգությունը»:
Հայտարարության մեջ ասվում է, որ հրամանը չի տարածվում բարձրագույն զինվորական ղեկավարության վրա: Հրամանատարությունում ընդգծել են, որ որոշումը չի նշանակում ամերիկացիների ընտանիքների գործուղման ավարտ:
«Մեր ընտանիքների վերադարձի մասին որոշումն ընդունվել է Պետքարտուղարության եւ ԱՄՆ-ի պաշտպանության նախարարի, ինչպես նաեւ Թուրքիայի կառավարության հետ խորհրդակցություններից հետո», -նշել է ԱՄՆ-ի Եվրոպական ուժերի գլխավոր հրամանատար Ֆիլիպ Բրիդլավը: Նա ընդգծել է «զինծառայողների ընտանիքներն անվտանգության մեջ պահելու» անհրաժեշտությունը:
Թուրքական ուժային կառույցները Թուրքիայի արեւելյան եւ հարավարեւելյան քրդաբնակ շրջաններում պարբերաբար ռազմական գործողություններ են իրականացնում Քրդստանի աշխատավորական կուսակցության» ազատամարտիկների դեմ:
Բաժանորդագրվեք մեր ալիքին Telegram-ում