6 րոպեի ընթերցում
ԵՐԵՎԱՆ, 10 ՄԱՐՏԻ, ԱՐՄԵՆՊՐԵՍ: Հայաստանում տեղեկատվական տեխնոլոգիաների ոլորտում որակյալ մասնագետների պահանջը բավարարելուն ուղղված տեխնոլոգիական համալսարանի հիմնումը կայանալու է պետություն-մասնավոր կուռ համագործակցության արդյունքում: Ինչպես «Արմենպրես»-ի հետ զրույցում նշեց ՀՀ էկոնոմիկայի փոխնախարար Էմիլ Տարասյանը, այն լիովին նոր մոդել է լինելու հայաստանյան կրթական համակարգում: «Տեխնոլոգիական համալսարանի կառավարումը իրականացվելու է պետություն-մասնավոր համագործակցության շնորհիվ: Մասնավորն իր ներդրումը պետք է ունենա կրթական ծրագրերում, որ կարողանա հետագայում այդ ուսանողներին ապահովել իրենց գիտելիքին համապատասխան, արժանավայել աշխատանքով: Սա փոխշահավետ ու հստակ խթանիչ մեխանիզմ է ինչպես ուսանողների համար, ովքեր ավարտելուց հետո ունենալու են աշխատանք, այնպես էլ մասնավորի համար, որի մոտիվացիան բուհի շրջանավարտներն են, ովքեր կլինեն ցանկալի մասնագետներ ու շահույթ կապահովեն կազմակերպությունների համար»,-ասաց փոխնախարարը:
Նրա խոսքով` ներկայիս կրթական համակարգի պատրաստած կադրերը չունեն տեղեկատվական տեխնոլոգիաների ոլորտի կազմակերպությունների պահանջները լիովին բավարարող հմտություններ: Ինչպես փոխնախարարն է նշում, այդ մասին բազմիցս հայտարարել են թե իրենք, թե մասնավոր հատվածը: «ՏՏ աջակցման խորհրդի նիստում քննարկվեց երրորդ սերնդի տեխնոլոգիական համալսարանի հիմնման անհրաժեշտությունը, աշխատանքային խումբ ստեղծվեց վարչապետի հանձնարարությամբ: Այն ղեկավարում է Կրթության և գիտության նախարարը, աշխատանքներում ներգրավված են Էկոնոմիկայի նախարարությունը, մասնավոր հատվածը, բուհական համակարգի ներկայացուցիչներ` ռեկտորներ»,-տեղեկացրեց Էմիլ Տարասյանը` հավելելով, որ հրավիրված միջազգային փորձագետների օգնությամբ էլ հստակեցվել է բուհի ընդհանուր կառուցվածքն ու սխեման: «Որոշվեց, որ դա արվելու է Պոլիտեխնիկական համալսարանի բազայի վրա` նոր կրթական ծրագրերով ու նոր կառուցվածքով»,-ասաց Էմիլ Տարասյանը: Փոխնախարարի դիտարկմամբ` մասնավորն այսօր էլ միջոցներ է ուղղում տարբեր կրթական ծրագրերի միջոցով որակյալ մասնագետներ պատրաստելուն: «Այս դեպքում նրանք կխնայեն միջոցներ, քանի որ կարվի համատեղ ուժերով և կստանան առավելագույն արդյունք»,-ավելացրեց նա:
Տեխնոլոգիական համալսարանը կրթական ծառայություն կմատուցի ինչպես բակալավրիատ, այնպես էլ մագիստրատուրա կրթական աստիճաններում: Ըստ Էմիլ Տարասյանի` մեր պատկերացրած մագիստրատուրան մի փոքր այլ ձևաչափով կգործի այստեղ: Որպես մագիստրոսական աշխատանք ուսանողներին կհանձնարարվեն դեռևս լուծում չունեցող կամ լուծում պահանջող խնդիրներ, որոնց վերաբերյալ նորարար առաջարկները կյանքի կկոչվեն:
Ինչ վերաբերում է դասավանդողներին, ապա կներգրավվի ինչպես ներկայում տարբեր բուհերում գործող դասախոսական կազմը, որը կվերապատրաստվի, այնպես էլ` հրավիրյալ դասախոսներ, հայաստանյան ու համաշխարհային ճանաչում ունեցող ընկերությունների ներկայացուցիչներ: «Երբ քննարկվում էր համալսարանի մոդելը, դասախոսների ժամանաքանակի ու վճարման հարցերը ևս մեր ուշադրության կենտրոնում են եղել: Լավ դասախոսը պետք է շատ վարձատրվի: Մենք նաև նախատեսում ենք, որ դասախոսությունները վարելու են ինչպես խոշորագույն կազմակերպությունների ներկայացուցիչները, որոնք հաջողությամբ են գործում ՏՏ ոլորտում, այնպես էլ աշխարհահռչակ ու հայտնի դասախոսներ: Կիրականացվի նաև գործող դասախոսական որոշակի մասի վերապատրաստում»,-հավելեց Էմիլ Տարասյանը:
Հարցին ի պատասխան, թե որքանով է կրթությունն այդ բուհում մատչելի լինելու պոտենցիալ ուսանողների համար` Էմիլ Տարասյանը հավաստիացրեց, որ վարձավճարը խոչընդոտ չի հանդիասանալու համալսարանում սովորելու համար: «Համալսարանը նախատեսում է ոչ մեծ քանակությամբ ուսանողների ներգրավում և հիմնական շեշտադրումը լինելու է ուսանողի գիտելիքը: Եթե գիտելիք ու ստեղծագործական միտք ունեցող աշակերտն ու ուսանողը ցանկություն հայտնեն սովորելու, պետք է ցանկացած աջակցություն ու արտոնություն ցուցաբերվի: Ըստ էության` ֆինանսների գործոնը լուծված է լինելու, քանի որ բուհի պահպանման հարցերը հոգալու են խոշորագույն կազմակերպությունները, այս դեպքում խոսքը չի գնում բարձր վարձավճարների մասին: Միգուցե պահանջարկով պայմանավորված տեղերը սպառվելուց հետո հավելյալ տեղերի դեպքում քննարկվի բարձր վարձավճարով տեղերի առկայության հարցը»,-հայտնեց Էմիլ Տարասյանը:
Ներկայում ծրագրի վերջնական մոդելի ձևավորման փուլն է, քննարկվում է նաև հեռահաղորդակցության ոլորտը ներառելու հարցը: «Մեկնարկը, կարծում եմ` շատ շուտ չի լինի, քանի որ արագացնել այս գործընթացը ուղղակի վտանգավոր է: Կարծում եմ` տարվա վերջում թե տարածքի, թե ձևաչափի, թե կոնկրետ կազմակերպությունների ներգրավվածության առումով կունենանք հստակեցում»,-վստահեցրեց փոխնախարարը:
Անի Նազարյան