2 րոպեի ընթերցում
ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ: Ինֆորմացիոն տեխնոլոգիաների համաշխարհային կոնգրեսը 2019 թվականին անցկացվելու է Հայաստանում: Այս մասին «Արմենպրես»-ի մամուլի սրահում հրավիրված ասուլիսին նշեց «Ինֆորմացիոն տեխնոլոգիաների ձեռնարկությունների միության» գործադիր տնօրեն Կարեն Վարդանյանը: Նրա խոսքով, սա աննախադեպ միջոցառում է Հայաստանի տեղեկատվական տեխլոգիաների ոլորտում:
«Մենք պետք է ամենաբարձր մակարդակով անցկացնենք այդ միջոցառումը: Այդ իսկ պատճառով այս և առաջիկա տարիներին պատվիրակություն ենք ուղարկելու այն երկրներ, որտեղ անցկացվելու է «Ինֆորմացիոն տեխնոլոգիաների համաշխարհային կոնգրես»-ը: Մասնավորապես, Բրազիլիա, Թայվան, Հնդկաստան: Մեր խնդիրն է լինելու առավելագույնս հասկանալ հնարավորությունները, որ կարողանանք այն արդյունավետ անցկացնել մեզ մոտ: Այդ կոնգրեսին սովորաբար մասնակցում են տեղեկատվական տեխնոլոգիաների ոլորտի թոփ-մենեջերները` մոտ 2 հազար մարդ: Դա նշանակում է, որ 2019 թվականը կարող է բեկումնային լինել Հայաստանի համար` ապահովելով կտրուկ աճի հնարավորություններ»,-ասաց Կարեն Վարդանյանը:
Այժմ քննարկվում է այն հարցը, թե ո՞րը կարող է լինել Հայաստանի ներկայանալու հիմնական խաղաքարտը: Կարեն Վարդանյանի խոսքով` իրենք եկել են այն եզրակացության, որ կարող է լինել դպրոցներում ինժեներական լաբորատորիաների առկայությունը:
«Մենք հույս ունենք, որ մինչև 2019 թվականը կարող ենք լինել աշխարհի այն եզակի երկրներից, որտեղ բոլոր դպրոցներում առկա են ինժեներական լաբորատորիաներ: Դա խոսում է այն մասին, որ ինժեներական կրթությունը հանրակրթական հատվածում դրված կլինի ամենաբարձր մակարդակի վրա»,-ավելացրեց միության գործադիր տնօրենը: