Աշխարհում գաղթականների թիվը հասել է 244 միլիոնի. ՄԱԿ

ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: Վերջին 15 տարվա ընթացքում աշխարհում գաղթականների թիվն ավելացել է 41 տոկոսով եւ 2015 թվականին հասել 244 միլիոնի: Ինչպես տեղեկացնում է «Արմենպրես»-ը, այս տվյալները տարածել է ՄԱԿ-ը՝ հավելելով, որ այդ թվի մեջ մտնում են գրեթե 20 մլն փախստականներ:

ՄԱԿ-ի գլխավոր քարտուղարի՝ տնտեսական եւ սոցիալական հարցերով տեղակալ Ու Հոնբոյի կարծիքով՝ կտրուկ աճը «արտացոլում է միջազգային միգրացիայի ավելի ու ավելի մեծ կարեւորությունը, որը դարձել է մեր տնտեսության եւ հասարակության անբաժանելի մասը»: «Լավ կառավարվող միգրացիայի հոսքերը հսկայական օգուտ են բերում երկրներին, ինչպես նաեւ հենց միգրանտներին ու նրանց ընտանիքներին»,- նշել է նա:

ՄԱԿ-ի տվյալների համաձայն՝ միջազգային միգրանտների թիվը գերազանցում է աշխարհի բնակչության աճի տեմպերը: Արդյունքում մոլորակի բնակիչների ընդհանուր թվաքանակում միգրանտների բաժինը 2015 թվականին հասել է 3,3 տոկոսի՝ 2000 թվականի 2,8 տոկոսի դիմաց: Ընդսմին Եվրոպայի, Հյուսիսային Ամերիկայի եւ Օվկիանիայի երկրներում միջազգային միգրանտների բաժինը կազմում է բնակչության ընդհանուր թվաքանակի առնվազն 10 տոկոսը: Աֆրիկայի, Ասիայի, Լատինական Ամերիկայի երկրներում այդ ցուցանիշը 2 տոկոսից պակաս է, հաղորդել է ՏԱՍՍ-ը:

Լուսանկարը` EPA