2 րոպեի ընթերցում
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանը մշակութային համագործակցության 8 միջազգային պայմանագիր է ստորագրել տարբեր երկրների հետ: Այս մասին լրագրողների հետ զրույցում նշեց ՀՀ մշակույթի նախարարի տեղակալ Ներսես Տեր-Վարդանյանը: «9 մշակույթի օրեր են անցկացվել, այդ թվում`Հայաստանի մշակույթի օրեր Չինաստանում, Գերմանիայում և Ռուսաստանում, ինչպես նաև Հայաստանում Հորդանանի, Գերմանիայի Սաքսոնիա-Անհալթ երկրամասի, Թուրքմենստանի, Իսրայելի, Ռուսաստանի մշակույթի օրեր: Միջազգային համագործակցության առումով պիտի նշեմ Եվրամիության «Ստեղծագործ Եվրոպա» ծրագրի մասին: Արդեն ծրագրի միացման տեխնիկական գործընթացն է իրականանում, հուսով ենք, որ մոտ ապագայում կավարտվի: Ծրագիրը հնարավորություն է տալիս հայաստանյան հասարակական կազմակերպություններին արտերկրի իրենց գործընկերների հետ համագործակցությամբ իրականացնել մեծածավալ մշակութային ծրագրեր»,-«Արմենպրես»-ի փոխանցմամբ`նշեց Ներսես Տեր-Վարդանյանը:
Նախարարի տեղակալը հատուկ շեշտեց, որ Հայաստանն այս տարի դարձել է Կինոյի աջակցության եվրոպական հիմնադրամի`«Եվրիմաժի» լիիրավ անդամ:
«Ծրագրի միացման գործընթացն ավելի վաղ էր սկսվել, երկար փուլեր անցնելուց հետո ի վերջո հավանության արժանացավ: Այն լայն հնարավորություններ է տալիս կինոարտադրողներին`համատեղ արտադրության համար»,-շեշտեց նա:
Բացի այդ, այս տարի մշակութային ժառանգության պահպանման և վերականգնման ոլորտում իրականացված հայ-իտալական կրթական ծրագիրն արժանացել է «Եվրոպա Նոստրա» հեղինակավոր կազմակերպության մրցանակին: