3 րոպեի ընթերցում
ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ:Ֆրանսահայ լեգենդար երգիչ Շառլ Ազնավուրն աշխարհին հիշեցրել է 1988 թվականի սոսկալի երկրաշարժի մասին: «Արմենպրես»-ի փոխանցմամբ` երգիչն իր ֆեյսբուքյան պաշտոնական էջում տարածել է «Քեզ համար, Հայաստան» («Pour toi Arménie») երգը:
«1988 թվականի դեկտեմբերի 7-ի սարսափելի երկրաշարժը Հայաստանում ավերածություններ պատճառեց, ինչը հանգեցրեց նրան, որ տասնյակ հազարավոր մարդիկ զոհվեցին, և հարյուր հազարավորներ մնացին առանց կացարան»,- տեսահոլովակին կցված գրառման մեջ նշել է Ազնավուրը:
1988 թվականի երկրաշարժից Շառլ Ազնավուրի հիմնադրած «Ազնավուրը Հայաստանին» բարեգործական հիմնադրամը («Aznavour pour l’Arménie») մշտապես աջակցություն է ցուցաբերել երկրաշարժից տուժածներին և շարունակում է ակտիվ գործունեություն ծավալել: 1993-ին հիմնադրամը գրասենյակ է բացել Երևանում:
«Արմենպրես»-ի հետ զրույցում «Ազնավուրը Հայաստանին» բարեգործական հիմնադրամի հայաստանյան ներկայացուցչության տնօրեն Ժերար Մարկոսյանը տեղեկացրեց, որ հիմնադրամը շարունակում է ակտիվ գործունեություն ծավալել:
«Ցավոք, մենք չենք կարողանում երկրի բոլոր խնդիրները և երկրաշարժի հետևանքները լուծել: Աշխատանք կա տանելու, որ երկրաշարժի հետևանքները լրիվ վերանան: Հիմնադրամն առողջապահական և գյուղատնտեսական ծրագրեր է իրականացնում, աջակցում հիվանդ երեխաներին, ինչպես նաև խթանում, որ մարդիկ իրենց հողերը մշակեն»,-նշեց նա:
Սպիտակի ահեղ երկրաշարժն ուղիղ 27 տարի առաջ խախտեց Հայաստան աշխարհի անդորրը: 1988թ. դեկտեմբերի 7-ին` տեղական ժամանակով ժամը 11:41 րոպեին, Հայաստանի մոտ 40 տոկոսը ընդգրկող տարածքում տեղի ունեցավ էպիկենտրոնում 10 բալ ուժգնությամբ ավերիչ երկրաշարժ: Հաշված վայրկյանների ընթացքում լրիվ կամ մասնակի ավերվեցին Սպիտակ, Լենինական, Կիրովական, Ստեփանավան քաղաքները, Սպիտակի, Ախուրյանի, Գուգարքի, Արագածի, Կալինինոյի, Ստեփանավանի շրջանների հարյուրից ավելի գյուղեր ու բնակավայրեր։
Զոհվեց 25 հազարից ավելի մարդ, 500 հազարը մնաց անօթևան։ Շարքից դուրս եկավ բնակֆոնդի 17 տոկոսը` շուրջ 8 միլիոն քառակուսի մետր բնակելի տարածություն։ Երկրաշարժի հետեւանքով լրիվ կամ մասամբ ավերվեցին ավելի քան 230 արդյունաբերական օբյեկտներ՝ 82 հազար աշխատատեղով։
POUR TOI ARMÉNIELe 7 décembre 1988, un terrible tremblement de terre dévasta l'Arménie, faisant plusieurs dizaines de milliers de morts et des centaines de milliers de sans-abris.Association Aznavour pour l'Arménie :http://www.charlesaznavour.com/fr/content?id=8
Posted by HAY prod on 7 декабря 2015 г.