Արմեն Մուրադյանն Արա Մինասյանին համակարգում անմնացորդ աշխատանքի համար պարգևատրել է մեդալով

ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: «Սուրբ Գրիգոր Լուսավորիչ» բժշկական կենտրոնի տնօրեն, պրոֆեսոր Արա Մինասյանի ծննդյան 60 և կենտրոնի ղեկավարման 25-ամյա հոբելյանը մեկ դահլիճում միավորել էր ոչ միայն կենտրոնի բուժանձնակազմին, այլև առողջապահության ոլորտի անվանի ներկայացուցիչների: Ինչպես «Արմենպրես»-ին տեղեկացրին ՀՀ առողջապահության նախարարությունից, Արմեն Մուրադյանի հրամանով համակարգում երկարատև և անմնացորդ աշխատանքի, ինչպես նաև բժշկագիտության զարգացման գործում ներդրած գնահատելի ավանդի համար և ծննդյան 60-ամյակի կապակցությամբ միջոցառման ավարտին Արա Մինասյանին հայտարարվել է շնորհակալություն և նա պարգևատրվել է նախարարության հուշամեդալով:

«Կցանկանայի առանձնահատուկ նշել, որ պրոֆեսոր Մինասյանը եզակի է իր բնույթով: Այս հիվանդանոցը մեր երկրի պետականության ձևավորման ակունքներից ի վեր մեծ ճանապարհ է անցել, հաղթահարել բազում փորձություններ: Արցախյան գոյամարտի տարիներին ևս մեր ժողովրդի, ազատամարտիկների, վիրավորների բուժօգնությունը կազմակերպելու գործում կենտրոնի ղեկավարը ջանք ու եռանդ չէր խնայում»,- շնորհավորելով հոբելյանի առթիվ` նշել է ՀՀ առողջապահության նախարար Արմեն Մուրադյանը` հավելելով, որ այսօր «Սուրբ Գրիգոր Լուսավորիչ» բժշկական կենտրոնը հասել է մեծ հաջողությունների:

«Հաշվի առնելով առանձնահատուկ ծանրաբեռնվածությունը` տարեկան շուրջ 46 000 դիմելություն ունեցողայս հիվանդանոցը, պետք է արդարացիորեն նշենք, որ իսկապես ժողովրդական հիվանդանոց է»,- ընդգծել է Արմեն Մուրադյանը: Նրա խոսքով, օրինակելի է, որ վերակենդանացման բաժանմունքում ամենածանր դեպքերի ժամանակԱրա Մինասյանը պատասխանատվությունը վերցնում է իր վրա, ձեռք է մեկնում կարիքավորներին: «Այս հիվանդանոցը իր տունն է»,- նկատել է Արմեն Մուրադյանը: Նախարարի գնահատմամբ, «Սուրբ Գրիգոր Լուսավորիչ» բժշկական կենտրոնի ղեկավարն առանաձնահատուկ հարգանք է տածել նաև ավագ գործընկերների հանդեպ: Դրա վառ օրինակն այս կենտրոնում բժիշկ- վիրաբույժ, հայ բժշկության նահապետ, ակադեմիկոս Սուրեն Ավդալբեկյանի թանգարանն է:

«Դուք առողջապահության այն կազմակերպիչն եք, ով մեծ դեր ունի նաև մեր երկրում ծննդօգնության որակի բարելավման գործում»,-ասել է ՀՀ ԱՆ գլխավոր մանկաբարձ գինեկոլոգ, ակադեմիկոս Ռազմիկ Աբրահամյանը: «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանն էլ նշել է, որ «Սուրբ Գրիգոր Լուսավորիչ» բժշկական կենտրոնն իր կարևոր տեղն ունի մեր երկրի առողջապահական համակարգում:

Իրենց ղեկավարին շնորհավորանքներ են ուղղել նաև բժշկական կենտրոնի տարբեր սերունդներ ներկայացնող բժիկները, ավագ և կրտսեր գործընկերները:

Արա Մինասյանը շնորհակալություն է հայտնել պարգևի համար` ընդգծելով, որ բժշկական կենտրոնի հաջողությունների հիմքում բուժանձնակազմի թիմային աշխատանքն է: Նա ուրախությամբ փաստել է, որ տարեցտարի կենտրոնի կոլեկտիվն ընդլայնվում է, համալրվում նոր մասնագետներով: