The Sunday Times-ը նշել է A321 օդանավում պայթյունի ենթադրյալ կազմակերպչի անունը
1 րոպեի ընթերցում
![The Sunday Times-ը նշել է A321 օդանավում պայթյունի ենթադրյալ կազմակերպչի անունը](http://armenpress.am/resized/480/static/news/b/2015/11/824997.jpg)
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Եգիպտոսում կործանված ռուսական Airbus A321 մարդատար ինքնաթիռում պայթյունի հնարավոր կազմակերպիչը «Սինայի վիլայաթ» ահաբեկչական խմբավորման պարագլուխ Աբու Ուսամա ալ Մասրին է: Այդ մասին, ինչպես տեղեկացնում է «Արմենպրես»-ը, հաղորդել է The Sunday Times բրիտանական թերթը՝ հղում անելով սեփական աղբյուրներին:
Ինչպես պնդում է հրատարակությունը, Մեծ Բրիտանիայի իշխանությունները հաստատել են այս տեղեկատվությունը եւ հայտարարել այդ ահաբեկչին բռնելու կամ վերացնելու գործը կազմակերպելու հարցում Ռուսաստանին կամ Եգիպտոսին աջակցություն ցուցաբերելու պատրաստակամության մասին: Այն դեպքում, եթե նման քայլ ձեռնարկվի, Լոնդոնն այդ գործողությանը մասնակից կդարձնի Հատուկ օդային ծառայության (SAS) բրիտանացի աշխատակիցներին:
Թերթի տվյալներով՝ Ուսամա ալ Մասրին եգիպտոսցի հոգեւորական է, որն ուսում Է առել «Ալ Ազհար» մուսուլմանական հոգեւոր համալսարանում:
Բրիտանական հետախուզության կողմից հրապարակված տվյալների համաձայն՝ ռումբն օդանավ է մտցրել «Սինայի վիլայաթ» խմբավորման անդամներից մեկը, որն աշխատում էր օդանավակայանում: Լոնդոնում մտահոգ են, որ նա մինչ այժմ ազատության մեջ է:
Լուսանկարը` ТАСС