Ռուսաստանը քննադատել է Թուրքիայի օդային տարածքում տեղի ունեցած միջադեպի առնչությամբ ՆԱՏՕ-ի պահվածքը

ԵՐԵՎԱՆ, 6 ՀՈԿՏԵՄԲԵՐԻ, ԱՐՄԵՆՊՐԵՍ: Արևմուտքն օգտագործում է ռուսական ռազմական ինքնաթիռների կողմից Թուրքիայի օդային սահմանը խախտելու միջադեպը Ռուսաստանի դեմ քարոզչական պայքարին ՆԱՏՕ-ին խառնելու համար: Ինչպես հաղորդում է «Արմենպրես»-ը՝ վկայակոչելով ռուսական «ՌԻԱ նովոստին», նման կարծիք է հայտնել ՆԱՏՕ-ում Ռուսաստանի մշտական ներկայացուցիչ Ալեքսանդր Գրուշկոն:

«Տպավորությունն այնպիսինն է, որ Թուրքիայի օդային տարածքում տեղի ունեցած միջադեպը օգտագործվել է ՆԱՏՕ-ին էլ արևմտյան տեղեկատվական քարոզչության մեջ ներառելու համար, ինչի նպատակը Սիրիայում Ռուսաստանի ուժայինների կողմից իրականացող գործողության նպատակները խեղաթյուրելն ու նենգափոխելն է»,- նշել է Գրուշկոն: Նրա հավաստմամբ՝ ռուսական կողմի բացատրություններն անտեսելը հենց խոսում է հոկտեմբերի 5-ին ՆԱՏՕ-ի խորհուրդ հրավիրելու նախաձեռնողների իրական մտադրության մասին:

Թուրքիայի արտաքին գործերի նախարարությունը հոկտեմբերի 5-ին Ռուսաստանին ուղղված կոշտ հայտարարություն էր տարածել՝ կապված հոկտեմբերի 3-ին Սիրիայում ռազմական գործողություններ իրականացնող ռուսական ինքնաթիռի՝ թուրքական օդային տարածքը խախտելու հետ: «Այս կապակցությամբ Անկարայում Ռուսաստանի դեսպանը կանչվել է նախարարություն, որտեղ նրան հայտնել ենք մեր կտրուկ բողոքը և պահանջել այսուհետև նման դեպք թույլ չտալ, հակառակ դեպքում հնարավոր ոչ ցանկալի հետևանքների պատասխանատվությունը կկրի Ռուսաստանի Դաշնությունը»,- ասվում է Թուրքիայի ԱԳՆ հայտարարության մեջ:

Ավելի ուշ ռուսական կողմը հստակեցում մտցրեց իրադրության մեջ: Ռուսաստանի պաշտպանության նախարարությունից հայտնեցին, որ Ռուսական Су-30 կործանիչը, որը Սիրիայում մասնակցում է «Իսլամական պետության» դեմ գործողություններին, Թուրքիայի օդային տարածքը խախտել է սխալմամբ` ոչ բարվոք եղանակային պայմանների պատճառով:

Այնուհետև տեղեկություններ տարածվեցին այն մասին, որ հոկտեմբերի 3-ի ներխուժումից զատ ռուսական ինքնաթիռները խախտել են Թուրքիայի օդային սահմանը նաև հոկտեմբերի 4-ին, սակայն այս մասին որևէ պաշտոնական հայտարարություն ռուսական կողմից դեռևս չի արվել:

Խնդրի վերաբերյալ հայտարարություն արեց նաև ՆԱՏՕ-ի գլխավոր քարտուղար Յենս Ստոլտենբերը՝ ասելով, որ պատահականություն չի համարում ռուսական ինքնաթիռների ներխուժումը Թուրքիայի օդային տարածք: