1 րոպեի ընթերցում
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայից «Իսլամական պետություն», «Ջեբհաթ ան Նուսրա» եւ «Ջեյշ ալ Յարմուկ» խմբավորումների երեք հազարից ավելի զինյալներ են փախել Հորդանան՝ երկյուղելով սիրիական բանակի ծավալուն հարձակումից: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին հայտնել է զինվորական մի աղբյուր:
«ԻՊ-ի, «Նուսրայի» եւ «Ջեյշ ալ Յարմուկի» առնվազն երեք հազար զինյալներ են փախել Հորդանան: Նրանք վախենում են բոլոր ռազմաճակատներում բանակի ակտիվացումից եւ ռուսական ինքնաթիռների ավիահարվածներից»,- ասել է գործակալության զրուցակիցը:
Աղբյուրի խոսքով՝ բանակը հոկտեմբերի 4-ին ԻՊ-ի եւ «Ջեբհաթ ան Նուսրայի» զինյալների դիրքերին հարվածներ է հարսցրել Դամասկոսի արվարձանում, Դեյր Զորի եւ Հոմսի նահանգներում, այդ թվում՝ Պալմիրա քաղաքի շրջանում:
Հոկտեմբերի 5-ին Սիրիայի ռազմաօդային ուժերի ինքնաթիռները թռուցիկներ են նետել Ռաստան եւ Թալբիսի բնակավայրերում, որոնցում ահաբեկիչներին առաջարկվում է վայր դնել զենքը, իսկ խաղաղ բնակիչներին՝ հեռանալ բնակավայրերից, որտեղ առաջիկայում պետք է սկսվի սիրիական զորքերի ընդգրկուն ռազմական գործողությունը
Լուսանկարը` AFP