3 րոպեի ընթերցում
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Շվեդիայի առողջապահության, հանրային առողջության և սպորտի նախարար Գաբրիել Վիկստրյոմի հրավերով սեպտեմբերի 16-ին մեկնարկել է ՀՀ առողջապահության նախարար Արմեն Մուրադյանի երկօրյա պաշտոնական այցը Շվեդիա։ Ինչպես «Արմենպրես»-ին տեղեկացրին ՀՀ առողջապահության նախարարությունից, այցի շրջանակներում նախատեսվում է երկկողմ ձևաչափով հանդիպում երկու նախարարների միջև, այցելություններ Շվեդիայի առողջապահության ոլորտի պետական, կրթական և գիտահետազոտական հաստատություններ, ինչպես նաև կլոր-սեղան քննարկում ոլորտի շվեդական ընկերությունների հետ։
Սեպտեմբերի 16-ին նախարար Մուրադյանի գլխավորած պատվիրակությունն այցելել է Ուպսալայի համալսարանի ակադեմիական հիվանդանոց, որը հանդիսանում է Շվեդիայի հնագույն համալսարանական կլինիկան՝ հիմնված 1708թ-ին։ Տնօրեն Մարիան վան Ռուիենի հետ հանդիպման ընթացքում ներկայացվել են հիվանդանոցի գործունեության հիմնական ուղղությունները և կիրառվող մեթադաբանությունը, քննարկվել են հիվանդանոց-համալսարան գիտական համագործակցության մոդելները, կազմակերպվել է շրջայց ռոբոտային վիրահատություններ իրականացնող Ուրոլոգիայի բաժանմունք։
Նախարար Մուրադյանի գլխավորած պատվիրակությունը հյուրընկալվել է նաև Ուպսալայի նահանգային խորհրդում և հանդիպել նախագահ Բորյե Վեննբերգի հետ։ Ներկայացվել են Շվեդիայում առողջապահության ոլորտի ֆինանսավորման մոդելները, կենտրոնական կառավարության և տեղական ինքնակառավարման մարմինների փոխգործակցության եղանակները։
Նախարար Մուրադյանն այցելել է նաև սկանդինավյան երկրներում ուռուցքների բուժման մեջ պրոտոնային թերապիա կիրառող առաջին հաստատությունը հանդիսացող Սկանդիոն կլինիկա, ինչպես նաև կենսական գիտությունների ոլորտում հանրային, մասնավոր և գիտական շրջանակների ներգրավմամբ հետազոտական ծրագրերով զբաղվող «Ուպսալա Բիո» ընկերություն։
Օրվա ավարտին նախարար Մուրադյանի գլխավորած պատվիրակությունը հյուրընկալվել է Ուպսալայի նահանգապետի նստավայրում՝ Ուպսալայի ամրոցում, որտեղ կազմակերպվել է Շվեդիայում բնակվող հայազգի բժիշկների և առողջապահության ոլորտի այլ մասնագետների հետ հանդիպում ։ Հանդիպման ավարտին Ուպսալայի նահանգապետ Պիտեր Էգարդտի անունից տրվել է ընթրիք`ի պատիվ նախարար Մուրադյանի: