Ադենն առաջիկա տարիներին կմնա Եմենի մայրաքաղաք
2 րոպեի ընթերցում
![Ադենն առաջիկա տարիներին կմնա Եմենի մայրաքաղաք](http://armenpress.am/resized/480/static/news/b/2015/08/815543.jpg)
ԵՐԵՎԱՆ, 17 ՕԳՈՍՏՈՍԻ, ԱՐՄԵՆՊՐԵՍ: Եմենի մեծությամբ երկրորդ քաղաք Ադենը, որը համարվում է Նախագահ Աբդ Ռաբբո Մանսուր ալ Հադիի կողմնակից ուժերի հենակետը, առաջիկա հինգ տարիների ընթացքում կպահպանի երկրի մայրաքաղաքի կարգավիճակը: Ինչպես հաղորդում է«Արմենպրես»-ը, վկայակոչելով արաբական լրատվամիջոցները, այս մասին օգոստոսի 16-ին հայտարարել է Ադենի նահանգապետ Նաիֆ ալ Բաքրին: Նրա խոսքով` երկրի նախագահն առաջիկա օրերին կայցելի Ադեն:
Ավելի վաղ` հուլիսի 17-ին, Եմենի վարչապետ Խալեդ ալ Բախախը հայտարարել էր Ադենի ազատագրման մասին: Այն նախագահի կողմնակից ուժերի առաջին մեծ հաջողությունն է:
Եմենում իրավիճակը առավել սրվել էր 2015թ. հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ Նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց Նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ հետո՝ մարտի 25-ին շիաների Ադեն մտնելով, հեռացել էր երկրից:
Նախագահը դիմել է Սաուդյան Արաբիային` խնդրելով միջամտել ստեղծված իրավիճակին: Մարտի 26-ին Սաուդյան Արաբիան Բահրեյնի, Քաթարի, Քուվեյթի, ԱՄԷ-ի օդային ուժերի օգնությամբ Եմենում իրականացվել է «Վճռականության փոթորիկ» գործողությունը, որի ավարտից հետո սկսվել է ռազմական գործողությունների մյուս՝ «Հույսի վերականգնում» փուլը:
Լուսանկարը` EPA