Թուրքիան Արարատ և Թոնդրակ լեռները հայտարարել է «ժամանակավոր ռազմական անվտանգության գոտի»
1 րոպեի ընթերցում
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Թուրքիայի արևելյան հատվածներում վերջին շրջանում ինտենսիվ դարձած հարձակումների և ահաբեկչական գործողությունների հետևանքով տեղական իշխանությունները երկրի մի շարք շրջաններ հայտարարել են որպես «հատուկ անվտանգության գոտի»: Ինչպես հաղորդում է «Արմենպրես»-ը, այս մասին տեղեկացնում է թուրքական «Անադոլու» գործակալությունը:
Աղրըի (Արարատ) նահանգապետարանը 15 օրով «ժամանակավոր ռազմական անվտանգության գոտի» է հայտարարել Արարատ և Թոնդրակ լեռների տարածքը:
Օգոստոսի 4-19-ը «հատուկ անվտանգության գոտի» է հայտարարվել նաև Թունջելի (նախկին Դերսիմ) նահանգի մի շարք գավառներում:
Ավելի վաղ Քիլիսի նահանգապետարանը ևս մեկ շաբաթով «հատուկ անվտանգության գոտի» էր հայտարարել Սիրիայի սահմանային չորս շրջաններում: