Անջելինա Ջոլին նոր խաղարկային ֆիլմ կնկարահանի

ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Հոլիվուդյան սիրված ու ճանաչված դերասանուհի և ռեժիսոր Անջելինա Ջոլին կնկարահանի խաղարկային լիամետրաժ ֆիլմ Կարմիր քխմերների ժամանակաշրջանի Կամբոջայի մասին։ Այս մասին դերասանուհին հայտնել է Հոլիվուդում տարածված հատուկ հայտարարությամբ։ Ինչպես տեղեկացնում է «Արմենպրես»-ը՝ վկայակոչելով ՏԱՍՍ-ը, նախագծում Ջոլիի գործընկերը կլինի Netflix մուլտիմեդիա ընկերությունը։

Կինոնկարը, որի վրա Ջոլին աշխատում է ոչ միայն որպես ռեժիսոր, այլ նաև որպես պրոդյուսեր, հիմնված է կամբոջացի գրող Լուն Ունի «Սկզբում նրանք սպանեցին իմ հայրիկին. Կամբոջայի դստեր հուշերը» (First they killed my father: a daughter of Cambodia remembers) գրքի վրա։ Հինգ տարեկանում աղջկան տարել է Կարմիր քխմերների հրամանատարությունը և դաստիարակել որպես մարտական ստորաբաժանման մարտիկ։

«Ունի գիրքը խորը տպավորություն է թողել իմ վրա»,- հայտարարել է Ջոլին՝ հավելելով, որ այն թույլ է տվել իրեն հասկանալ, թե ինչպես են երեխաները վերապրում պատերազմը և ինչպես է այն ազդում նրանց հոգեբանության վրա։

«Ես ուրախ եմ, որ կարող եմ այժմ նկարահանել ֆիլմ ինձ համար այդքան կարևոր գրքի հիման վրա»,- ընդգծել է դերասանուհին։ Ֆիլմի սցենարը Ջոլին և Ուն միասին են գրում։

Ակնկալվում է, որ ֆիլմը վարձույթում կհայտնվի 2016 թվականի երկրորդ կեսին։ Կարմիր քխմերների կառավարությունը Կամբոջայում ղեկավարել է 1975-1979թթ.: Ընդհանուր առմամբ՝ տարբեր տվյալներով՝ զանգվածային սպանությունների հետևանքով զոհվել է 1,7-3 միլիոն մարդ: