Թուրքիայի «Ազգայնական շարժում» կուսակցությունը հրաժարվել է կոալիցիա կազմել իշխող ուժի հետ
3 րոպեի ընթերցում
![Թուրքիայի «Ազգայնական շարժում» կուսակցությունը հրաժարվել է կոալիցիա կազմել իշխող ուժի հետ](http://armenpress.am/resized/480/static/news/b/2015/07/812241.jpg)
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Թուրքիայում հունիսի 7-ին անցկացված խորհրդարանական ընտրություններում միանձնյա կառավարություն ձեւավորելու համար անհրաժեշտ քանակի պատգամավորական տեղեր չստացած «Արդարություն եւ զարգացում» կուսակցության նախագահ եւ վարչապետի պաշտոնակատար Ահմեթ Դավութօղլուն շարունակում է կոալիցիոն կառավարություն կազմելու շուրջ խորհրդարան անցած կուսակցությունների հետ բանակցությունները:
Ինչպես հաղորդում է «Արմենպրես»-ը` վկայակոչելով թուրքական HaberTurk լրատվական կայքը, Դավութօղլուն առաջինը հանդիպել է «Ազգայնական շարժում» կուսակցության (ԱՇԿ) առաջնորդ Դեւլեթ Բահչելիի հետ: Հանդիպումից հետո վերջինս հայտարարել է, որ իր ղեկավարած կուսակցությունը չի կարող կոալիցիա կազմել իշխող ԱԶԿ-ի հետ` «Թուրքիայի ապագայի հարցում տեսակետների խիստ տարբերության» պատճառով:
Դավութօղլուն նույն օրը հանդիպել է նաեւ խորհրդարանում զբաղեցրած պատգամավորական աթոռների թվով երկրորդը հանդիսացող Ժողովրդահանրապետական կուսակցության (ԺՀԿ) առաջնորդ Քեմալ Քըլըչդարօղլուի հետ: Այդ հանդիպումից հետո Քըլըչդարօղլուն հայտարարել է, որ կոալիցիայի համար իրենց առաջադրած 14 սկզբունքներից միայն 4-ի շուրջ չեն կարողացել համաձայնության գալ: Նա նշել է, որ պատրաստ են ԱԶԿ-ի հետ շարունակել կոալիցիա կազմելու շուրջ բանակցությունները:
Բահչելին էլ հավելել է, որ եթե ԱԶԿ-ԺՀԿ կոալիցիան տեղի չունենա, ապա իրենք կարող են այդ հարցի շուրջ շարունակել ԱԶԿ-ի հետ բանակցությունները:
Այսօր Դավութօղլուն կոալիցիայի շուրջ բանակցություններ է սկսել Թուրքիայի խորհրդարանում 80 պատգամավորական աթոռներ զբաղեցրած քրդական Ժողովուրդների դեմոկրատական կուսակցության (ԺԴԿ) առաջնորդ Սալահեթդին Դեմիրթաշի հետ: Հանդիպումը հիմնականում նվիրված է քրդական խնդրի դեմոկրատական լուծման գործընթացի քննարկմանը, որը սկսվել էր 2009 թվականին եւ մինչ այժմ որեւէ առաջընթաց չի ունեցել ԱԶԿ-ի կողմից ստանձնած պարտավորությունները չկատարվելու պատճառով:
Այդ հանդիպումներից առաջ Դավութօղլուն ԶԼՄ-ներին հայտնել է, որ «աշխատելու են, որպեսզի որեւէ դուռ չփակվի», եւ շարունակելու են կուսակցությունների բանակցությունները, քանի դեռ որեւէ մեկի հետ կոալիցիայի շուրջ համաձայնության չեն եկել եւ արձանագրություն չեն ստորագրել: