Մեծ Բրիտանիան պատրաստվում Է մասնակցել ԻՊ-ի դեմ կոալիցիային

ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Մեծ Բրիտանիայի իշխանությունները կցանկանային միանալ ԱՄՆ-ի գլխավորությամբ գործող կոալիցիային, որը Սիրիայում ավիահարվածներ Է հասցնում «Իսլամական պետություն» ահաբեկչական խմբավորմանը. նրանք կարող են այդ հարցը ներկայացնել խորհրդարանի քննարկմանը: Այդ մասին, ինչպես տեղեկացնում Է «Արմենպրես»-ը, հուլիսի 3-ին գրում Է բրիտանական The Daily Telegraph թերթը:

Ավիահարվածների հասցնելու առաջարկը, հնարավոր Է, կպաշտպանեն ոչ միայն իշխանության գլուխ գտնվող պահպանողականների կուսակցության պատգամավորները, այլեւ ընդդիմադիրներից շատերը: Այսպես, լեյբորիստները հայտարարել են, որ վերջերս տեղի ունեցած արյունալի ահաբեկչական գործողությունից հետո, որը կազմակերպվել Էր Թունիսի ծայրահեղականների կողմից, համաձայն են պաշտպանել ԻՊ-ի դեմ պայքարի կոշտ միջոցները: Միեւնույն ժամանակ խորհրդարանի մի շարք անդամներ, այնուամենայնիվ, հանդես են գալիս ավիահարվածների դեմ, քանզի կարծում են, որ ռմբակոծումները, թուլացնենով ԻՊ-ն, կուժեղացնեն Սիրիայի կառավարական զորքերի դիրքերը:

Թերթն ընդգծում Է, որ ահաբեկիչների դեմ գործողություններին մասնակցության հարցի շուրջ վերջնական որոշման ընդունումը, դատելով ըստ ամենայնի, կտեւի մի քանի ամիս: Մասնավորապես, դա կապված Է այն բանի հետ, որ պահպանողականները ցանկանում են խորհրդարանում քվեարկությանն սպասել մինչեւ սեպտեմբեր, երբ լեյբորիստները կընտրեն իրենց նոր առաջնորդին, հաղորդել Է «Ինտերֆաքս»-ը: