1 րոպեի ընթերցում
ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Հայոց ցեղասպանության 100-րդ տարելիցին նվիրված 4 խոշոր ցուցադրություններ տեղի կունենան Հայոց ցեղասպանության թանգարան-ինստիտուտում 2015 թվականի երկրորդ կեսին:
«Արմենպրես»-ի հաղորդմամբ՝ լրագարողների հետ հանդիպմանն այս մասին հայտարարեց թանգարան-ինստիտուտի տնօրեն Հայկ Դեմոյանը:
Համահայկական խաղերի կապակցությամբ օգոստոսի 1-ին կներկայացվի բացառիկ ժամանակավոր ցուցադրություն՝ «Հայկական սպորտը և մարմնամարզությունն Օսմանյան կայսրությունում» թեմայով: Առաջին նման ցուցադրությունը բացվել է 2009 թվականին սահմանափակ տարածքում: «Այդ ընթացքում մեր հավաքածուն այս թեմայի շուրջ եռապատկվել է»,- ասաց Դեմոյանը:
Իսկ հուլիսի 8-12-ը կայանալու է 15 տարվա մեջ ցեղասպանագետների ամենամասշտաբային հավաքը Հայաստանում: Ցեղասպանությունների ուսումնասիրությամբ զբաղվող 250-300 մասնագետներ կգան Երևան՝ մասնակցելու ցեղասպանագետների միջազգային ընկերակցության 12-րդ համաժողովին:
Մյուս երկու միջոցառումների մասին Դեմոյանը գերադասեց առայժմ փակագծերը չբացել: