2 րոպեի ընթերցում
ԵՐԵՎԱՆ, 4 ՄԱՅԻՍԻ, ԱՐՄԵՆՊՐԵՍ: Եվրամիության անդամ պետությունների բոլոր տարածաշրջաններում գործազրկության ամենացածր մակարդակը Պրահայում Է, այն կազմում Է ընդամենը 2,5 տոկոս: Այդ մասին, ինչպես տեղեկացնում Է «Արմենպրես»-ը, մայիսի 4-ին հաղորդել Է Պրահայի Novinky կայքը՝ հղում անելով ԵՄ-ի վիճակագրական գործակալության՝ Eurostat-ի տվյալներին:
«Eurostat-ի տվյալների համաձայն՝ 2014 թվականի արդյունքներով Եվրամիության անդամ պետությունների բոլոր տարածաշրջանների թվում գործազրկության ամենացածր մակարդակն ուներ Պրահան՝ 2,5 տոկոս: Գործազրկության ամենաբարձր մակարդակը գրանցվել Է Իսպանիայի Անդալուզիայի ինքնավար մարզում, որտեղ աշխատանք չունի բնակչության 34,8 տոկոսը»,- ասված Է հաղորդագրության մեջ:
Պրահայից հետո ԵՄ-ում գործազրկության ամենացածր ցուցանիշով առաջին տասնյակի մնացած տեղերն զբաղեցնում են Գերմանիայի տարածաշրջանները:
Ընդամենը 2014 թվականին ԵՄ-ի երկրների 54 տարածաշրջաններ ունեին 5 տոկոսից ցածր գործազրկության մակարդակ. 23 տարածաշրջան՝ Գերմանիայում, 16՝ Մեծ Բրիտանիայում, 6 Ավստրիայում, երեքական՝ Բելգիայում եւ Ռումինիայում, մեկական՝ Չեխիայում, Իտալիայում եւ Հունգարիայում:
Իր հերթին, բնակչության ավելի քան 20 տոկոսն աշխատանք չուներ ԵՄ-ի 29 տարածաշրջաններում. Իսպանիայում 13, Հունաստանում՝ 12 եւ Իտալիայում՝ 4 տարածաշրջան, հաղորդել Է ՌԻԱ Նովոստին: