2 րոպեի ընթերցում
ԵՐԵՎԱՆ 22 ԱՊՐԻԼԻ ԱՐՄԵՆՊՐԵՍ: Մեկ դար առաջ հայերը սպանվեցին հայ լինելու համար, մեկ դար առաջ հայերը սպանվեցին քրիստոնյա լինելու համար եւ այսօր, Հայոց ցեղասպանությունից հարյուր տարի անց պետք է հարցն առաջ քաշել, դատապարտել՝ նման գործողությունները հետագայում կանխելու համար: Երեւանում «Ընդդեմ ցեղասպանության հանցագործության» ֆորումի ժամանակ նման տեսակետ հայտնեց Եվրոպական խորհրդարանի նախագահի տեղակալ Ռիչարդ Չառնեցկին:
«Արմենպրես»-ի փոխանցմամբ, Չառնեցկին ասաց, որ ինքը գիտի, թե ինչ է նշանակում ցեղասպանություն եւ գիտի, թե այն ինչ ահավոր չարիք է ցեղասպանություն ապրած սերունդների համար: «Եվրոպական խորհրդարանի անունից, Եվրոմիության 500 միլիոն բնակչության անունից հարգանքի տուրք եմ մատուցում հայ ժողովրդին, ովքեր վերապրեցին Հայոց ցեղասպանություն` ազգային մեծագույն ողբերգությունը: Ինձ ծանոթ է այդ զգացողությունը, ցեղասպանության կենսափորձ ունի նաեւ Լեհաստանը: Մեկ դար առաջ հայերը սպանվեցին միայն հայ լինելու պատճառով, սպանվեցին միայն քրսիտոնյա լինելու պատճառով: Ես հիացմունքով եմ հայացքս հառում հայ ժողովրդին, որ հպարտ է իր պատմական մեծագույն ժառանգությամբ, հիանալի մշակույթվ եւ քաղաքակրթությամբ: Լեհերը, եվրոպացիները գիտեն, որ կարող ենք կերտել ապագա` թիկունք շրջելով դեպի անցյալը: Այս արարողությունն ու համաժողովը կոչ է աշխարհին եւ երիտասարդներին, ում ձեռքում է աշխարհի ապագան»,- ասաց Չառնեցկին: