Խաղի ժամանակ «Դեպորտիվո Արմենիա»-ի ֆուտբոլիստները կրել են Հայոց ցեղասպանության տարելիցին նվիրված շապիկներ

ԲՈՒԵՆՈՍ ԱՅՐԵՍ, 20 ԱՊՐԻԼԻ, ԱՐՄԵՆՊՐԵՍ: Բուենոս Այրեսում «Մերլո»- «Դեպորտիվո Արմենիա» ֆուտբոլային հանդիպման ժամանակ Deportivo Armenia-ի ֆուտբոլիստները կրել են Հայոց ցեղասպանության 100-րդ տարելիցին նվիրված շապիկներ: Ինչպես հաղորդում է «Արմենպրես»-ը` վկայակոչելով PrensaArmenia.com.ar-ը, խաղից հետո նրանք լուսանկարվել են Հայոց ցեղասպանությանը նվիրված պաստառի ներքո՝ պահանջելով միջազգային հանրությունից ճանաչել եւ դատապարտել Հայոց ցեղասպանությունը:

Ավելի ուշ ֆուտբոլային ակումբից հայտարարել են, որ վաճառքի են հանվել Հայոց ցեղասպանությանը նվիրված մարզաշապիկները, որոնց ողջ հասույթը կտրամադրվի համայնքում բարեգործական աշխատանքների իրականացմանը:

Լուսանկարները` PrensaArmenia.com.ar