Չիլինգարովը խոստացել է աջակցել Ավետիսյանների սպանության գործով ՌԴ կողմից տեղեկատվության տրամադրմանը
2 րոպեի ընթերցում
ԳՅՈՒՄՐԻ« 25 ՓԵՏՐՎԱՐԻ« ԱՐՄԵՆՊՐԵՍ: Գյումրու քաղաքապետ Սամվել Բալասանյանը փետրվարի 25-ին ընդունել է Ռուսաստանի Դաշնային ժողովի Դաշնության խորհրդի անդամ, Խորհրդային Միության հերոս, գիտնական Արթուր Չիլինգարովի գլխավորած պատվիրակությանը, որի կազմում էին նաև ռուսական լրատվամիջոցների ներկայացուցիչներ:
Քաղաքապետը նախ ողջունել է հայազգի մեծանուն գիտնականին՝ բարձր գնահատելով Արթուր Չիլինգարովի անուրանալի ներդրումը ինչպես գիտության, այնպես էլ քաղաքականության մեջ: Ինչպես «Արմենպրես»-ին տեղեկացրին քաղաքապետարանի մամուլի գրասենյակից, քաղաքապետը նաև կարևորել է մեծ գիտնականի դերը հայ և ռուս ժողովուրդների բազմադարյա բարեկամության ամրապնդման հարցում:
Արթուր Չիլինգարովը շնորհակալություն է հայտնել ջերմ ընդունելության և բարձր գնահատանի համար` միաժամանակ նշելով, որ Գյումրի է եկել՝ ցավակցելու հունվարի 12-ին Ավետիսյանների ընտանիքի 7 անդամների մահվան կապակցությամբ: Նա նաև հետաքրքրվել է դեպքից հետո քաղաքում տիրող իրավիճակից, ինչին ի պատասխան քաղաքապետ Սամվել Բալասանյանը նշել է, որ այս պահին առկա է գործի նախաքննության հետ կապված տեղեկատվության տրամադրման անհրաժեշտություն: Արթուր Չիլինգարովը խոստացել է նշված հարցը բարձրացնել ռուսական կողմի մոտ:
Արմենուհի Մխոյան