2 րոպեի ընթերցում
ԵՐԵՎԱՆ, 15 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ առողջապահության նախարար Արմեն Մուրադյանն այցելել է «Ավան» հոգեկան առողջության կենտրոն: Նախարարի այցն անսպասելի է եղել ոչ միայն բժշկական կենտրոնում բուժում ստացողների, այլ նաև ղեկավարության համար: Ինչպես «Արմենպրես»-ին տեղեկացրին ՀՀ առողջապահության նախարարությունից, Արմեն Մուրադյանը դիսպանսեր հսկողության բաժանմունքում զրուցել է հիվանդների հետ, հետաքրքրվել նրանց առողջական վիճակով: Նախարարի հետ զրույցում քաղաքացիներն իրենց դժգոհությունն են հայտնել գոյացող հերթերից, ծառայության գերծանրաբեռնվածությունից:
Նախարարը հոգեկան առողջության կենտրոնի տնօրեն Արեգա Հակոբյանին խիստ հանձնարարականներ է տվել: Հիվանդների համար կենտրոնի ծառայություններն առավել հասանելի դարձնելու նպատակով քննարկվել են դիսպանսերային ծառայությունը Երևանի վարչական շրջանների պոլիկլինիկաներ տեղափոխելու, կադրային, ինչպես նաև հիվանդասենյակների թերհագեցվածության խնդիրները:
Քննարկվել է նաև ՀՀ ԱՆ գլխավոր մասնագետների` հոգեկան առողջության կենտրոններ պարբերաբար համայցերի կատարումը` հետազոտություններ և խորհրդատվություն իրականացնելու նպատակով:
Արմեն Մուրադյանը նախարարության աշխատակազմի ներկայացուցիչների հետ եղել է նաև երկրորդ բաժանմունքում, ուր այս պահի դրությամբ բուժում է ստանում 40 հիվանդ: Նախարարն այցելել է նաև ճաշարան, ծանոթացել մատուցվող սննդի պահպանման ժամկետներին, ճաշացանկին:
Հոգեկան խանգարումներով տառապող անձանց հոգեբանասոցիալական և արտթերապևտիկ ամբուլատոր բաժանմունքում նախարարին են ներկայացվել իրականացվող ծառայությունները, հիվանդների բուժման ժամանակակից մեթոդները: