ՀՀ նախագահ Ռոբերտ Քոչարյանը հրամանագիր է ստորագրել ՀՀ Վերաքննիչ եւ ընդհանուր իրավասության դատարանների դատավորներ նշանակելու մասին
2 րոպեի ընթերցում
ԵՐԵՎԱՆ, 10 ԴԵԿՏԵՄԲԵՐԻ, ԱՐՄԵՄՊՐԵՍ: ՀՀ նախագահ Ռոբերտ Քոչարյանը դեկտեմբերի 7-ին հրամանագիր է ստորագրել ՀՀ Վերաքննիչ եւ ընդհանուր իրավասության դատարանների դատավորներ նշանակելու մասին: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, Մասիս Ռեհանյանը նշանակվել է Հայաստանի Հանրապետության քրեական վերաքննիչ դատարանի դատավոր` դադարեցնելով նրա Երեւան քաղաքի Արաբկիր եւ Քանաքեռ-Զեյթուն համայնքների առաջին ատյանի դատարանի դատավորի լիազորությունները: Երեւան քաղաքի Կենտրոն եւ Նորք-Մարաշ համայնքների ընդհանուր իրավասության դատարանի դատավորներ են նշանակվել` Ռուբեն Ափինյանը` դադարեցնելով նրա Հայաստանի Հանրապետության քրեական վերաքննիչ դատարանի դատավորի լիազորությունները. Արմեն Խաչատրյանը` դադարեցնելով նրա Տավուշի մարզի առաջին ատյանի դատարանի դատավորի լիազորությունները: Ալեքսանդր Մերանգուլյանը նշանակվել է Երեւան քաղաքի Էրեբունի եւ Նուբարաշեն համայնքների ընդհանուր իրավասության դատարանի դատավոր` դադարեցնելով նրա Գեղարքունիքի մարզի առաջին ատյանի դատարանի դատավորի լիազորությունները: Հովհաննես Մելքոնյանը նշանակվել է Արմավիրի մարզի ընդհանուր իրավասության դատարանի դատավոր` դադարեցնելով նրա Շիրակի մարզի առաջին ատյանի դատարանի դատավորի լիազորությունները: Վլադիմիր Ասլանյանը նշանակվել է Արագածոտնի մարզի ընդհանուր իրավասության դատարանի դատավոր` դադարեցնելով նրա Հայաստանի Հանրապետության տնտեսական դատարանի դատավորի լիազորությունները: Հրամանագիրն ուժի մեջ է մտնում 2008 թվականի հունվարի 1-ից: