1 րոպեի ընթերցում
ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ: Վրաստանի Ուղղափառ եկեղեցու միջեկեղեցական կապերի բաժնի ղեկավար, Զուգդիդի եւ Ցիաշի մետրոպոլիտ Գերասիմը հուլիսի 22-ին հանդիպել է Վիրահայոց թեմի առաջնորդ Վազգեն Միրզախանյանին եւ քննարկել Թբիլիսիի Սուրբ Էջմիածին եկեղեցու վրա հարձակումը: Ինչպես հաղորդում է «Արմենպրես»-ը` վկայակոչելով «Գրուզիա օնլայնը»-ը, հանդիպմանը կողմերը շեշտել են, որ միջադեպը չունի հոգեւոր եւ էթնիկ բնույթ: «Թբիլիսիի հայկական Սուրբ Էջմիածին եկեղեցում տեղի ունեցած հարձակումն անընդունելի է եւ Վրաստանի Ուղղափառ եկեղեցին դատապարտում է այդ միջադեպն ու կողմերին խաղաղության եւ հանգստության կոչ անում: Բացի այդ, Վրաց եկեղեցին կփորձի նպաստել խնդրի կարգավորմանն ու կրոնական բոլոր ներկայացուցիչների խաղաղ գոյակցությանը»,- ասված է հայտարարության մեջ:
Հուլիսի 19-ի երեկոյան հարձակում է իրականացվել Թբիլիսիի Սուրբ Էջմիածին եկեղեցու հոգևոր դասի, թեմի պաշտոնեության և հավատացյալների վրա: Դեպքի առնչությամբ հարուցվել է քրեական գործ: Վրաստանի ՆԳՆ-ն կատարվածը որակել է կենցաղային միջադեպ: