«Հայաստան» հիմնադրամը մի շարք ծրագրեր է իրականացրել Տավուշի Խաչարձան, Լուսաձոր եւ Դիտավան համայնքներում

ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: «Հայաստան» համահայկական հիմնադրամի հոգաբարձուների խորհրդի անդամներից, տեղական մարմինների ներկայացուցիչներից, բարերարներից եւ աշխատակիցներից կազմված պատվիրակությունը մայիսի 23-ին հաշվետու այցով եղել է Տավուշի մարզի Խաչարձան, Լուսաձոր եւ Դիտավան գյուղերում: Ինչպես «Արմենպրես»-ին տեղեկացրին Հիմնադրամի մամուլի ծառայությունից, 400 բնակիչ ունեցող Խաչարձանում կառուցվել է բուժկետ եւ բազմաֆունկցիոնալ սրահ` արգենտինահայ բարերար Կալչիյանների ընտանիքի հովանավորությամբ: Նորակառույցը կահավորվել է եւ համալրվել խոհանոցային սարքավորումներով: «Այսուհետ միայն ծայրահեղ անհրաժեշտության դեպքերում կարիք կլինի հասնել շրջկենտրոն»- նկատել է համայնքի ղեկավար Գագիկ Շահնազարյանը: Գյուղապետի խոսքով, համայնքի առաջնային խնդիրներից շարունակում է մնալ խմելու ջրի հարցը:

Լուսաձոր գյուղում Ֆրանսիայի տեղական մարմնի ֆինանսավորմամբ հիմնվել է ֆերմա, որին նվիրաբերվել է Շվեյցարիայից ու Դանիայից բերված 180 տոհմային կով: Հիմնադրամի` գյուղերի զարգացման ծրագրի շրջանակներում, Իտալիայի կառավարության ֆինանսավորմամբ ՄԱԿ-ի զարգացման ծրագիրը համայնքում իրականացրել է խմելու եւ ոռոգման ջրի, ինչպես նաեւ համայնքային կենտրոնի կառուցման ծրագրեր:Համայնքն ունի 700 բնակիչ:

Դիտավանում Կալչիյան ընտանիքի ֆինանսավորմամբ գյուղի 5 ընտանիքների համար կառուցվել են տնամերձ ջերմոցներ: Բնակիչ Հրաչ Ալիխանյանը պատմել է, որ առաջին տարին է, ինչ գործում է իր ջերմոցը: Լոլիկ, լոբի, սխտոր, ելակ ու կանաչի է աճեցնում, մոտ օրերս էլ առաջին բերքը կստանա:

300 բնակիչ ունեցող Դիտավան համայնքը, շնորհիվ Հիմնադրամի արգենտինահայ բարերարներ Արմեն եւ Նատիա Էքսերճիէանների շարունակական աջակցության, այսօր ունի խմելու ջուր, գազ, համայնքային կենտրոն եւ դպրոց: