Նախագահ Սերժ Սարգսյանը ցավակցական հեռագրեր է հղել Բոսնիա և Հերցեգովինայի ու Սերբիայի նախագահներին
1 րոպեի ընթերցում
ԵՐԵՎԱՆ, 19 ՄԱՅԻՍԻ, ԱՐՄԵՆՊՐԵՍ: ՀՀՆախագահ Սերժ Սարգսյանն այսօր ցավակցական հեռագրեր է հղել Բոսնիա և Հերցեգովինայի Հանրապետության Նախագահության Նախագահ Բակիր Իզեթբեգովիչին և Սերբիայի Հանրապետության Նախագահ Տոմիսլավ Նիկոլիչին՝ Բոսնիա և Հերցեգովինային ու Սերբիային պատուհասած ավերիչ ջրհեղեղի կապակցությամբ, որը տասնյակ մարդկային զոհերի և ահռելի ավերածությունների պատճառ է դարձել` հասցնելով նյութական մեծ վնասներ։
Ինչպես«Արմենպրես»-ին տեղեկացրին ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից,Սերժ Սարգսյանը խորին ցավակցություն և զորակցություն է հայտնել նախագահներ Բակիր Իզեթբեգովիչին և Տոմիսլավ Նիկոլիչին, զոհվածների ընտանիքներին, Բոսնիա և Հերցեգովինայի ու Սերբիայի բարեկամ ժողովուրդներին և նրանց դժվարին այս պահը հաղթահարելու համար մաղթել համբերություն, ուժ ու կորով:
Հանրապետության Նախագահը վստահություն է հայտնել, որ Բոսնիա և Հերցեգովինայի ու Սերբիայի իշխանությունների կողմից ձեռնարկված միջոցառումները թույլ կտան հաղթահարել այդ երկրներին պատուհասած դաժան փորձությունը: