2 րոպեի ընթերցում
ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: Ֆրանսիահայ լեգենդար երգիչ Շառլ Ազնավուրը մարտի 15-ի երեկոյան ելույթ է ունեցել Թել Ավիվի «Նոկիա» համերգասրահում: «Արմենպրես»-ը, վկայակոչելով newsru կայքի իսրայելական ծառայությունը, տեղեկացնում է, որ Ազնավուրը Սուրբ հող էր ժամանել մարտի 14-ին` իր թոռան հետ: Երուսաղեմում Արտասուքի պատի մոտ տեղի է ունեցել շանսոնյեի թոռան համար նախատեսված բար-միցվայի արարողությունը: Ազնավուրի թոռան մայրը հրեուհի է: Ուրբաթ երեկոյան Ազնավուրը մասնակցել է Իսրայելում Ֆրանսիայի դեսպանի ընթրիքին, որտեղ հրավիրված էին նաև որոշ իսրայելցի երաժիշտներ:
Վերջին անգամ Ազնավուրն Իսրայելում համերգ է տվել նախորդ տարի նոյեմբերի 23-ին` նույն համերգասրահում: Այն ժամանակ երգիչը խոստացել էր հանդիսատեսին վերադառնալ համերգով: «Հայերն ու հրեաներն այնքան ողբերգություններ են հաղթահարել, որ եթե մեր ժողովուրդները չսիրեին կյանքը, մենք վաղուց կանհետանայինք: Ես գիտեմ, որ մենք ծնվում ենք մահանալու համար, բայց մինչ այդ պետք է ամբողջ ուժով ապրենք: Ինձ ուղղորդում է ապրելու ցանկությունը»,-ասել էր Ազնավուրն իր նախորդ այցի ընթացքում հրավիրված մամուլի ասուլիսի ընթացքում:
Ազնավուրը նաև հիշեցրել էր ներկաներին, որ իր ընտանիքում կան և կաթոլիկներ, և բողոքականներ, և հրեաներ, և մահմեդականներ: Այդ իսկ պատճառով նա հավատում է, որ մարդիկ կարող են ապրել` անկախ կրոնական և քաղաքական հայացքներից:
Ազնավուրը պատմել էր, որ աշխարհում ամենից շատ սիրում է ճամփորդել և երգել աշխարհի ամենատարբեր ու հեռու ծայրերում, որովհետև ոչինչ չի հարստացնում, որքան նոր տպավորությունները և այլ մշակույթները: Երգիչը խոստովանել էր, որ նրան շատ հարազատ է իր համերգների մտերմիկ մթնոլորտը և նա նախընտրում է հանդիսատեսի հետ կիսել թե իր ուրախությունը, և թե խնդիրները: Իր երկարատև կարիերայի ընթացքում Ազնավուրը հասկացել է, որ հանդիսատեսի հետ անկեղծությունը նրան ուժ է տալիս և ուրախացնում ներկաներին` օգնելով ավելի լավ ընկալել իր երգերը: