Արսեն Խոջայանը մոլորվել ու ադրբեջանական կողմում է հայտնվել մառախուղի պատճառով. Վերին Կարմիրաղբյուրի գյուղապետ
1 րոպեի ընթերցում
ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Տավուշի մարզի Վերին Կարմիրաղբյուրի գյուղապետ Կամո Չոբանյանը հաստատում է տեղեկատվությունը, որ հայ-ադրբեջանական սահմանը հատած քաղաքացին իրենց համագյուղացին է: «Արմենպրես»-ի հետ զրույցում գյուղապետը նշեց, որ մամուլում հայտնված լուսանկարը, անուն-ազգանունը համընկնում են:
«Արսեն Խոջայանը յոթ երեխաներից բաղկացած ընտանիքի ավագ որդին է, ով անասուններին տարել էր արածացնելու ու, քանի որ գյուղում արդեն մի քանի օր է` ուժեղ մառախուղ է, հնարավոր է, նա մոլորվել է ու հայտնել ադրբեջանական կողմում»,- ասաց Կամո Չոբանյանը: Նրա խոսքով` ներկայում էլ ուժեղ մառախուղ է գյուղում, և բոլորը շարունակում են փնտրել երիտասարդին:
Ադրբեջանական xezerxeber.az կայքը հրապարակել է սահմանն անցած ՀՀ քաղաքացու լուսանկարը, որը քաղաքացիական հագուստով է, իսկ Ադրբեջանի Գերիների, պատանդների ու անհայտ կորածների պետական հանձնաժողովի քարտուղար Շահին Սայիլովի խոսքերով՝ նա ծնվել է 1991-ին, անուն-ազգանունը՝ Արսեն Խոջայան։