2 րոպեի ընթերցում
ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: Հաղորդավար, հումորիստ, շոումեն, պրոդյուսեր Գարիկ Մարտիրոսյանը Սուրբ Վալենտինի օրը տոնում է իր ծննդյան տարեդարձը: Տարին հոբելյանական է շոումենի համար` փետրվարի 14-ին լրանում է նրա 40-ամյակը: Մարտիրոսյանն իրականում ծնվել է փետրվարի 13-ին, սակայն նրա ծնողները խնդրել են որպես երեխայի ծննդյան օր գրանցել փետրվարի 14-ը` նշելով, որ 13 թիվն այնքան էլ հաջողակ չէ:«Արմենպրես»-ի փոխանցմամբ, Գարիկ Մարտիրոսյանը ծնվել է 1974 թվականի փետրվարի 14-ին, Երևանում: Վաղ հասակից սիրել է երաժշտությունը, նվագել է մի քանի գործիք, ստեղծագործել: Սովորել է Երևանի Մ. Հերացու անվան բժշկական համալսարանում: Սկզբնական շրջանում աշխատել է որպես նյարդաբան-թերապևտ: 1993-2002 թթ. խաղացել է «Նոր հայեր» ՈՒՀԱ թիմում:
2005 թվականից ռուսական «ТНТ» հեռուստաընկերությամբ ընկերների հետ ստեղծել է «Քոմեդի քլաբ» հումորային ծրագիրը, որը մինչ այժմ մեծ ժողովրդականություն է վայելում: Երգչուհի Լարիսա Դոլինայի հետ մասնակցել է ռուսական «Երկու աստղ» շոու-ծրագրին և դարձել հաղթող: «Նաշա ռաշա» հաղորդաշարի սցենարի հեղինակն ու պրոդյուսերն է: Հեղինակել և վարել է բազմաթիվ հաղորդումներ և շոուներ ռուսական առաջատար հեռուստաընկերություններով:Ներկայում շոումենը բնակվում է Ռուսաստանում: Մարտիրոսյանն ամուսնացած է, ունի երկու երեխա: