Վարչապետը պարզաբանեց գազի սակագնի նվազեցման հարցը

ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: Պետք է ավելանան գազի սպառման ծավաները, նվազեն «Հայռուսգազարդ»-ի ծախսերն, ու նոր հսկայական ներդրումների պայմաններում գազի սպառման ծավալները կաճեն, ինչն էլ կնպաստի սակագնի նվազմանը: Դեկտեմբերի 27-ին կայացած մամուլի ասուլիսի ժամանակ նման տեսակետ հայտնեց ՀՀ վարչապետ Տիգրան Սարգսյանը` հավելելով, որ գազի սակագինը սահմանին 189 դոլար է, իսկ քաղաքացիներին, միջին հաշվարկով, վաճառվում է 310 դոլարով:

Ըստ վարչապետի` սա բարձր գին է գազի համար, սակայն դա ունի իր պատճառները: «Արմենպրես»-ի փոխանցմամբ` սահմանից այս կողմ գազի սակագնի մեջ առկա տարբերությունը ներառում է «Հայռուսգազարդ» ՓԲԸ ընկերության ծախսերը, որոնք կազմում են 60 դոլար 1000 խմ գազի բաշխման համար, կորուստները հաշվառված են 11 դոլար, իսկ ավելացված արժեքի հարկի բաղադրիչը 50 դոլար է: «Հիշեցնեմ, որ սոցիալապես խոցելի խավերի համար կառավարությունը սուբսիդավորում է գազի գինը, որպեսզի քաղաքացիների համար լրացուցիչ ծախս չլինի: Գոյություն ունի ՀՀ Նախագահի հանձնարարականը` սուբսիդավորումը շարունակել նաեւ հաջորդ տարի, որպեսզի թանկացումները բացասաբար չազդեն հասարակության վրա»,- ասաց վարչապետը: