1 րոպեի ընթերցում
ԿԱՊԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Կապանի եւ Մեղրիի տարածաշրջաններն ընդգրկող Սյունիքի թիվ 38 ընտրատարածքում սեպտեմբերի 29-ին կայանալիք ԱԺ մեծամասնական ընտրակարգով լրացուցիչ ընտրություններում առաջադրումների համար նախատեսված ժամկետի նախավերջին օրը` օգոստոսի 14-ին, առաջադրվել է ԱԺ պատգամավորի առաջին թեկնածուն` Պավլիկ Վասպուրի Սարգսյանը:
Թիվ 38 ԸԸՀ-ի քարտուղար Ռամելա Հակոբյանը «Արմենպրես»-ին տեղեկացրեց, որ ինքնաառաջադրված Պ. Սարգսյանն անկուսակցական է, կենսաթոշակառու (ծնվել է 1948թ.-ին.): Որպես ԱԺ պատգամավորի թեկնածու գրանցման համար անհրաժեշտ փաստաթղթերից Պավլիկ Սարգսյանը չի ներկայացրել միայն անհրաժեշտ գրավի 1 մլն դրամի անդորրագիրը: «Առաջադրվածների գրանցման գործընթացը նախատեսված է օգոստոսի 15-25-ը, եւ ինքնաառաջադրված Պավլիկ Սարգսյանը այդ ժամանակահատվածում կարող է ներկայացնել անդորրագիրը: Հակառակ դեպքում հանձնաժողովը, ելնելով օրենքի պահանջից, ստիպված կլինի չգրանցել նրան որպես ԱԺ պատգամավորի թեկնածու», - ասաց թիվ 38 ԸԸՀ-ի քարտուղար Ռամելա Հակոբյանը: Վաղը` օգոստոսի 15-ին ժամը 18.00-ին կավարտվի թեկնածուների առաջադրման ժամկետը: