Մասնագետները մտահոգված են. թուրքերն ու ադրբեջանցիները յուրացնում են հայկական գորգագործական մշակույթը

ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Մասնագետները բարձրաձայնում են հայկական գորգագործության թանգարան ունենալու անհրաժեշտության մասին: Դրանով ե'ւ սեփական մշակույթի պրոպագանդման, ե'ւ թուրքերի ու ադրբեջանցիների կողմից հայկական գորգագործական մշակույթի յուրացումը կանխելու խնդիրները կլուծվեն: Գորգագործության ներկա վիճակի, առկա պրոբլեմների և ճգնաժամից դուրս գալու միտումների մասին հունիսի 1-ին հրավիրված ասուլիսում իրենց տեսակետներն արտահայտեցին պատմական գիտությունների թեկնածու, գորգագետ Անխունջ Պողոսյանը, «Մեգերյան կարպետ» ընկերության մարկետինգի գծով տնօրեն Հայկ Այվազյանը և արտադրության գծով տնօրեն Լեոնիդ Անդրեասյանը: «Արմենպրես»-ի հաղորդմամբ` նրանք միակարծիք են` հայկական գորգագործական մշակույթի տարածման, հասարակության շրջանում հետաքրքրվածության բարձրացման, ինչպես նաև աշխարհում այն հայտնի դարձնելու գործում անհրաժեշտ է պետական ուշադրություն:

Գորգագետ Աշխունջ Պողոսյանը նշեց, որ հայկական գորգագործության ճակատագրի հարցը նոր չէ, դեռ 150 տարի առաջ սկսվել էր գորգագործության մշակույթի յուրացման գործընթացը թուրքերի կողմից: «Թուրքերին մշակութային հենք էր անհրաժեշտ, որը կարող էին ապահովել հարևան ազգերը` հայերը, հույները, ասորինեը: Գորգագործությունը նրանց կողմից յուրացված ուղղություններից մեկն էր»,-ասաց գորգագետը: Ադրբեջանցիների կողմից նույն գործընթացները ծավալվեցին ավելի ուշ` 1960-ականներին: «Այդ ամենի մեղավորը միայն մենք ինքներս են: Մենք պարտավոր ենք տեր կանգնել մեր պատմամշակութային ժառանգությանը»,-հավելեց Աշխունջ Պողոսյանը: Հարցի մասնակի լուծումը գորգագետը տեսնում է գորգի առանձին թանգարան ունենալու, ինչպես նաև գորգագործական մշակույթը ուսումնասիրող գիտական բաժիններ ստեղծելու մեջ:

«Մեգերյան կարպետ»արտադրության գծով տնօրենԼենոիդ Անդրեասյանը տեղեկացրեց, որ ընկերությունը հայկական գորգեր արտադրում է 2002 թ.-ից: Մինչև 2009 թվականը ԱՄՆ է արտահանվել 150 հազար քառակուսի մետր գորգ: Երկրորդ տարին անընդմեջ ընկերությունը ԱՄՆ Ատլանտա և Գերմանիայի Հանովեր քաղաքներում տեղի ունեցող տարբեր երկրների գորգերի ցուցահանդեսին ներկայացնում է հայկական գորգը:

«Մեգերյան կարպետ» ընկերության մարկետինգի գծով տնօրեն Հայկ Այվազյանն էլ նշեց, որ տարեցտարի ավելանում է հայկական գորգը ճանաչողների թիվը: «Որքան շատ ժամանակ անցնի, այնքան շատ կճանաչեն հայկական գորգերը` որպես Հայաստանի մշակույթի մի մաս»,-ասաց Այվազյանը: Նա կարևորեց թանգարաններում գորգերի ցուցադրության հանգամանքը և հույս հայտնեց, որ ապագայում կունենանք նաև գորգերի թանգարան ու աշխարհին կարող ենք ցուցադրել մեր հարուստ գորգագործական ավանդույթները: Գորգագործությունը զբոսաշրջիկներին ներկայացնելու գործում իր ավանդն է ներդնում նաև ընկերությունը` կազմակերպելով տուրիստական անվճար տուրեր դեպի գորգերի արտադրամաս, ուր պահպանված են հայկական գորգագործության ավանդույթները: Հայկ Այվազյանը խոսեց նաև Կառավարության կողմից արված աշխատանքի մասին` արտադրանքի վրայից հանելով ավելացված արժեքի հարկը, որը մեծ աջակցություն էր գորգագործներին:

Նոյեմբերի 20-22-ին Երևանում կկայանա հայկական գորգագործության մշակույթին նվիրված միջազգային գիտաժողով, որը հրավիրվում է Մշակույթի նախարարության աջակցությամբ: